ԲԴԽ-ը դիրքորոշում չունի՞, արդյոք հանրային քննարկումը չի՞ ճնշի դատարանին. Գ. Կոստանյանը՝ ՊՊԾ գնդի գործով հանրային քննարկում անցկացնելու մասին

20:55 • 16.05.18

Հանրային քննարկումները որևէ քրեական գործի վերաբերյալ կարող են ճնշում գործադրել դատարանի նկատմամբ,իսկ արդարադատության իրացումը բացառում է նաև հանրային ճնշումը։

Այս մասին  Tert.am-ի հետ զրույցում ասաց ԱԺ պատգամավոր, ՄԻԵԴ-ում ՀՀ ներկայացուցիչ, Նախարարների կոմիտեում Հայաստանի պատվիրակության ղեկավար Գևորգ Կոստանյանը՝ անդրադառնալով ՀՀ վարչապետ Նիկոլ Փաշինյանի այն հայտարարությանը, որ իր համար ակնհայտ է, որ «Սասնա ծռերի» գործի հանգուցալուծումը խիստ կարևոր է Հայաստանում համերաշխության մթնոլորտի հաստատման համար, և այդ նպատակով պետք է լինեն հանրային քննարկումներ տարբեր ձևաչափերում: 

-Պարո՛ն Կոստանյան, իրավապահները բազմիցս են բարձրաձայնում դատարանների անկախության խնդրի մասին,հանրային քննարկումների կազմակերպումն արդյոք չի՞ կաշկանդի հասարակական հնչեղություն ունեցող գործերով դատավորներին,մասնավորապես ՊՊԾ գունդը զավթելու մեջ մեղադրվողների գործը քննող դատավորներին։

-Ցանկացած քրեական գործի կամ դատարանում քննվող որևէ գործի առնչությամբ հանրային քննարկումների իրականացումը նույն ՄԻԵԿ կոնտեքստում կարող է դիտվել որպես ճնշում դատարանի և արդարադատության վրա, հետևաբար, ես կարծում եմ, որ Բարձրագույն դատական խորհուրդը պետք է այս հարցի վերաբերյալ դիրքորոշում հայտնի, որպեսզի հանրությունը կարողանա գնահատել՝ արդյոք որևէ քրեական գործի վերաբերյալ, որը գտնվում է դատական քննության փուլում, հանրային քննարկումները չեն դիտվի ճնշում արդարադատություն իրականացնող դատավորի վրա։ Ես կարծում եմ, որ Բարձրագույն դատական խորհուրդը այս հարցի վերաբերյալ պետք է հայտնի իր դիրքորոշումը։

-Իսկ իրավաբանորեն, Ձեր տեսակետից, արդյոք հանրային քննարկման անցկացումը հենց ճնշում չէ՞։

-Ես ունեմ իմ միանշանակ դիրքորոշումը, բայց եթե ես այն արտահայտեմ՝ դա կարող է դիտվել կաշկանդող Բարձրագույն դատական խորհրդի համար, հետևաբար, ես պարզապես ակնկալում եմ ԲԴԽ-ի արձագանքը որևէ քրեական գործով հանրային քննարկում անցկացնելու վերաբերյալ։

-Պարո՛ն Կոստանյան, ընդունենք, որ հանրային քննարկում է տեղի ունենում, կայացվում է որոշում, դա ի՞նչ ազդեցություն կունենա իրավական առումով։ Հանրային քննարկումներն իրավական հետևանք կարո՞ղ են ունենալ։

-Հանրային քննարկումն իրավական ոչ մի հետևանք չունի և չի էլ կարող ունենալ, բայց հանրային քննարկման փաստը և արդյունքը կարող են դատարանին կաշկանդել, ճնշում գործադրել, իսկ արդարադատության իրացումը բացառում է նաև հանրային ճնշումը։