«Նաիրիտը» վերագործարկելու քաղաքական կամք արդեն, կարծես թե, կա.գործարանի արհմիության նախագահ
Բաղրամյան 26-ի դիմաց նաիրիտցիների բողոքի ակցիան ավարտվել է: Tert.am-ի հետ զրույցում «Նաիրիտի» արհմիության նախագահ Հրաչ Թադևոսյանը նշեց, որ վարչապետի աշխատակազմի ներկայացուցիչների հետ հանդիպման ժամանակ ներկայացրել են իրենց հուզող խնդիրները՝ թե՛ ներկա աշխատողների պարտքերի մարման վերաբերյալ, թե՛ գործարանի վերագործարկման վերաբերյալ. և իրենց խոստացել են խնդիրները ներկայացնել Նիկոլ Փաշինյանին:
«Ակնկալում ենք, որ Նիկոլ Փաշինյանի հետ հանդիպում հետագայում կլինի, տեսնենք ինչպես կորոշի նա: Գործարանի նախկին աշխատողներն էլ են Նիկոլ Փաշինյանին նամակ գրել և ակնկալում են հանդիպում, հուսանք՝ ընդհանուր խումբ կկազմվի, հանդիպում կլինի: Եվ ճիշտ չեն այն պնդումները, թե ակցիայի կազմակերպիչները աշխատավարձի խնդրով են միայն Բաղրամյան 26-ի դիմաց, վերագործարկման խնդիրը ամենակարևորն է, բայց ներկա աշխատակիցները փետրվարից աշխատավարձ չեն ստացել: Ընդհանուր պարտքը կազմում է մոտ 40 մլն, հարկերը հանած՝ 32 մլն դրամ»,- շեշտեց նա:
Անդրադառնալով աշխատավարձերի պարտքին՝ Հրաչ Թադևոսյանը հիշեցրեց, որ 2017-ի հուլիսին Արտակարգ իրավիճակների նախարարությունը պայմանագիր էր կնքել 116 աշխատակցի հետ, արդեն այս տարվա փետրվարի 22-ին նախարարությունը հետին ամսաթվով՝ հունվարի 8-ին մակագրված փաստաթղթով դադարեցրել է աշխատակիցների հետ պայմանագիրը, տնօրենն աշխատակիցներին հորդորել է, որ շարունակեն աշխատանքը, քանի որ ամեն ինչ անելու են, որ 6 ամսվա պայմանագիր կնքվի:
Ինչ վերաբերում է գործարանի վերագործարկմանը, ապա Հրաչ Թադևոսյանը ասաց, որ այդ հարցում ամենակարևորը քաղաքական կամքն է, որը այս պահին, կարծես թե, կա:
Անի Գևորգյան










