Սաուդյան Արաբիայում անցկացվում է կանանց համար ավտոմեքենաների առաջին ցուցահանդեսը (տեսանյութ)

14:27 • 16.05.18

Սաուդյան Արաբիայի մայրաքաղաք Էր Ռիադում անցկացվում է կանանց համար նախատեսված ավտոմեքենաների առաջին ցուցահանդեսը: Այս մասին հայտնում է Eye Ofr Ryad-ը:

Նշվում է, որ Pinkish («Վարդագույնի մեջ») կոչվող ցուցահանդեսը կտևի երեք օր:

Աղբյուրը մանրամասնում է, որ ավտոմեքենաները տեսնելուց բացի կանայք կկարողանան խոսել ավտոդիլերների և ապահովագրական ընկերությունների ներկայացուցիչների հետ և իմանալ հատուկ առաջարկությունների մասին:

Սպասվում է, որ ցուցահանդեսը կայցելի մոտ 80 հազար մարդ:

Հիշեցնենք, որ կանայք Սաուդյան Արաբիայում մեքենայի ղեկին նստելու հնարավորություն կստանան հունիսի 24-ին: 

18 տարին լրացած կանայք կկարողանան գրանցվել թագավորության տարբեր նահանգների 5 քաղաքի ավտոդպրոցներում՝ վարորդական իրավունք ստանալու համար: Դպրոցներում դասավանդելու են տեղացի կանայք, որոնք վարորդական իրավունք ստացել են արտասահմանում: