ԵԽԽՎ-ում պատժամիջոցներ են սահմանել ադրբեջանցի Սամեդ Սեիդովի և կոռուպցիայի համար կասկածվող ևս 3 պատվիրակի դեմ

10:37 • 16.05.18

Լուսանկարում՝ Պեդրո Ագրամունտն ու Սամեդ Սեիդովը

 

Եվրոպայի խորհրդի խորհրդարանական վեհաժողովի (ԵԽԽՎ) մշտական հանձնաժողովը պատժամիջոցներ է սահմանել ԵԽԽՎ նախկին նախագահ Պեդրո Ագրամունտի և պատգամավոր Ժորդի Շուկլայի դեմ, հայտնում է minval.az-ը:

Այդ մասին Facebook-ում հայտնել է ԵԽԽՎ փոխնախագահ, ուկրաինական պատվիրակության անդամ, Պյոտր Պորոշենկոյի դաշինքից ժողովրդական պատգամավոր Վլադիմիր Արևը:

Հաղորդվում է, որ նրանք երկուսն էլ ռուսական ինքնաթիռով թռել են Սիրիա՝ այդ երկրի նախագահ Բաշար ալ Ասադի հետ հանդիպման:

«Ագրամունտին և Ուկրաինայի գծով նախկին համազեկուցող Շուկլային Ադրբեջանի հետ կապված կոռուպցիոն սկանդալից հետո մեղավոր են ճանաչել վարքագծի կանոնների լուրջ խախտման համար: Նրանք երկուսն էլ զրկվել են ԵԽԽՎ անդամների համար գործող կանոններով նախատեսված իրավունքներից՝ բացի ձայնի և բանաձևեր նախաձեռնելու իրավունքից: Ագրամունտի նկատմամբ պատժամիջոցներ են սահմանվել 10 տարով, իսկ Շուկլայի դեմ՝ 2 տարով»,- գրել է նա:

«Եվրոպեյսկայա պրավդա»-ին տված մեկնաբանությունում Արևը հստակեցրել է, որ հանձնաժողովը համաձայնել է պատգամավորներին պատժելու անհրաժեշտությանը՝ չնայած իրավաբանորեն նրանց մեղքը դեռ ապացուցված չէ: Որոշումը հիմնվել է ԵԽԽՎ-ում համակարգային կոռուպցիայի մասին արտաքին քննչական խմբի զեկույցի հիման վրա:

Ագրամունտից և Շուկլայից բացի, ուկրաինացի պատգամավորի խոսքով, պատժամիջոցների տակ են հայտնվել նաև պատվիրակներ Չեզար Ֆլորին Պրեդան և ադրբեջանցի Սամեդ Սեիդովը: Նրանց նկատմամբ սահմանափակող միջոցներ են սահմանվել երկու տարով: