Իսրայելի խորհրդարանի ավելի քան 50 պատգամավոր պատրաստ է ճանաչել Հայոց ցեղասպանությունը. իսրայելական լրատվամիջոցներ

15:54 • 17.05.18

Իսրայելի կողմից Հայոց ցեղասպանության ճանաչման նախաձեռնությունը տպավորիչ տեմպերով թափ է առնում: Այդ մասին գրում է jewishpress.com-ը՝ վկայակոչելով Իսրայելական ռադիոյին:


«Սիոնիստական միություն» կուսակցությունից պատգամավոր Իցիկ Շմուլիի ներկայացրած օրինագիծը ստացել է կոալիցիայի և ընդդիմադիր կուսակցություններից առնվազն 50 խորհրդարանականի աջակցությունը:

Օրինագիծը ներկայացվել է Թուրքիայի նախագահ Ռեջեփ Թայիփ Էրդողանի՝ Իսրայելի դեմ արած հայտարարություններից հետո:

Օրինագծում նշվում է, որ Քնեսետը պետք է պաշտոնապես ճանաչի Հայոց ցեղասպանությունը և դրա հիշատակման համար հատուկ օր հայտարարի: Բացի այդ, օրինագծով նախատեսվում է, որ Իսրայելը պետք է պաշտոնապես ճանաչի ասորիների կոտորածը:

«Բացի այն փաստից, որ շատ երկրներ արդեն ճանաչել են Հայոց ցեղասպանությունը, կա ևս մի փաստ, որ իմաստ չկա թուրքերին վերաբերել հատուկ զգայունությամբ՝ Իսրայել պետության դեմ Թուրքիայի նախագահ Էրդողանի սադրանքի ֆոնին»,- ասել է Շմուլին:

Իր հերթին, տրանսպորտի նախարար Իսրայել Կացն Իսրայելական ռադիոյին տված հարցազրույցում հայտնել է, որ «ոչ մի բարոյական խոչընդոտ չկա Հայոց ցեղասպանությունը ճանաչելու համար»:

Քնեսետի խոսնակ Յուլի Էդելշտեյնը հայտարարել է, որ նա կանի հնարավոր ամեն բան և օրինագծի առաջխաղացման համար կօգտագործի իրեն հասանելի բոլոր գործիքները:

Ավելի վաղ հաղորդվել է, որ Իսրայելի կրթության նախարար և Անվտանգության խորհրդի անդամ Նաֆտալի Բենեթն արձագանքել է Թուրքիայից Իսրայելի դեսպանին արտաքսելու որոշմանը և Իսրայելի դատապարտմանը: Բենեթը նաև կոչ է արել Իսրայելի կառավարությանն արձագանքել՝ պաշտոնապես ճանաչելով Հայոց ցեղասպանությունը և բոյկոտելով Թուրքիային:

Բացի այդ, Իսրայելի վարչապետ Բինյամին Նեթանյահուի որդին՝  Յաիր Նեթանյահուն, Գազայի հատվածում լարված իրավիճակի հետ կապված թուրք-իսրայելական հարաբերությունների կտրուկ սրման ֆոնին սոցցանցերում հայհոյել է Թուրքիային։

Հիշեցնենք, որ Թուրքիայի նախագահ Ռեջեփ Թայիփ Էրդողանը, մեկնաբանելով Գազայի հատվածում տեղի ունեցածը, Իսրայելին ահաբեկչական պետություն էր անվանել, բացի այդ՝ նա հետ է կանչել Թել Ավիվում ու Վաշինգտոնում իր դեսպաններին՝ ստեղծված իրավիճակի շուրջ խորհրդակցության համար։

Բինյամին Նեթանյահուն, իր հերթին, պատասխանելով Էրդողանին, նշել էր, որ նա վերջին մարդն է, ով կարող է իրենց բարոյականության դասեր տալ։