Քննչական կոմիտեն քրեական գործ է հարուցել արմավիրցիների զանգվածային թունավորման փաստով
ՀՀ քննչական կոմիտեում քրեական գործ է հարուցվել ՀՀ քրեական օրենսգրքի 277-րդ հոդվածի 1-ին մասով:
Այս մասին Tert.am-ին հայտնեցին ՀՀ քննչական կոմիտեից: Հիշեցնենք ՔՕ նշված հոդվածը՝ Սանիտարահակահամաճարակային կանոնները խախտելը, որն անզգուշությամբ առաջացրել է մարդկանց զանգվածային հիվանդացում կամ թունավորում:
Այս հանցանքի համար նախատեսված է պատիժ՝ տուգանքով՝ նվազագույն աշխատավարձի առավելագույնը երկուհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 3 տարի ժամկետով, կամ ազատազրկմամբ՝ առավելագույնը 3 տարի ժամկետով:
Նշանակված են դատաբժշկական և դատասննդային փորձաքննություններ՝ պարզելու թունավորման պատճառը:
Հիշեցնենք, որ երեկ Արմավիրում սննդային թունավորմամբ հիվանդանոց էր տեղափոխվել 90 անձ. բոլոր անձինք հայտնել են, որ կերել են մատակարար կազմակերպության առաքած հավով և մայոնեզով սենդվիչը:
ՔԿ-ից հավելեցին, որ դեռ պարզ չէ՝ արդյոք թունավորումը եղել է այդ սենդվիչներից, ինչպես նաև նշեցին, որ հիվանդանոց է տեղափոխվել 71 անձ:










