Վենեսուելայի ընդդիմադիր խորհրդարանը ցանկանում է տարեվերջին նոր նախագահական ընտրություններ անցկացնել

11:16 • 22.05.18

Վենեսուելայի նախագահի ընտրությունները միայն խորացրել են երկրում ճգնաժամը, ընդդիմությունը պնդելու է տարեվերջին նախագահի նոր ընտրություններ անցկացնելու հարցում: Այդ մասին հայտարարել է Վենեսուելայի ազգային ժողովի ղեկավար Օմար Բարբոսան, հաղորդում է «ՌԻԱ Նովոստի»-ն:

Վենեսուելայի ազգային ընտրական խորհրդի տվյալներով՝ երկրի գործող նախագահ Նիկոլաս Մադուրոն հաղթանակ է տարել վերջերս անցկացված ընտրություններում և հավաքել է 6,19 միլիոն ձայն: Նա զբաղեցնելու է երկրի նախագահի պաշտոնը 2019-2025 թվականներին:

«Մենք կպայքարենք տարեվերջին նոր ընտրություններ անցկացնելու համար»,- հայտարարել է Բարբոսան:

2015 թվականի դեկտեմբերին ընտրությունների արդյունքներով՝ Վենեսուելայի իշխող կուսակցությունը կորցրել է խորհրդարանի նկատմամբ վերահսկողությունը: Տեղերի մեծ մասը ստացել է «Ժողովրդավարական միասնության կլոր սեղան» դաշինքը, իսկ իշխանությունները, կորցնելով խորհրդարանի նկատմամբ վերահսկողությունը, պարզապես նրան բացառել են որոշումների կայացման համակարգից՝ բոլոր օրենսդիր լիազորությունները փոխանցելով Նիկոլաս Մադուրոյին հավատարիմ Ազգային հիմնադիր ժողովին:

Ի դեպ, Մադուրոն շնորհակալություն է հայտնել Ռուսաստանի նախագահ Վլադիմիր Պուտինին՝ նախագահական ընտրություններում իր հաղթանակը ճանաչելու համար, ինչպես նաև Չինաստանի ղեկավար Սի Ցզինպինին, Թուրքիայի նախագահ Ռեջեփ Թայիփ Էրդողանին, Սիրիայի և Իրանի իշխանություններին՝ աջակցության համար: