Հրաժարականի դիմում ներկայացրել եմ վարչապետին, բայց դեռ չի հաստատվել. Լոռու մարզպետ

12:19 • 25.05.18

Հրաժարականի դիմում ներկայացրել եմ ՀՀ վարչապետ Նիկոլ Փաշինյանին, բայց այն դեռ չի հաստատվել: Այս մասին Tert.am-ին հայտնեց Լոռու մարզպետ, Հայաստանի Հանրապետական կուսակցության անդամ Արթուր Նալբանդյանը, որը 2011 թ. հուլիսի 28-ից զբաղեցնում է այս պաշտոնը: Նրա կարծիքով՝ յուրաքանչյուր նոր կառավարություն պետք է իր թիմով ամբողջ կառավարման պատասխանատվությունը կրի:

- Լրատվամիջոցներում երեկվանից տեղեկություններ են տարածվում, որ մի շարք մարզպետներ հրաժարական են ներկայացրել, այդ թվում՝ Լոռու մարզպետը: Հաստատո՞ւմ եք այդ տեղեկությունը, պարո՛ն Նալբանդյան:

- Այո, հրաժարականի դիմում ներկայացրել եմ վարչապետին, բայց դեռ չի հաստատվել:

- Ինչո՞ւ ի վերջո որոշեցիք հրաժարական տալ:

- Գտնում եմ, որ յուրաքանչյուր նոր կառավարություն պետք է իր թիմով ամբողջ կառավարման պատասխանատվությունը կրի:

- Ի՞նչ վիճակում եք Լոռու մարզը փոխանցում հաջորդ մարզպետին:

- Սա այն դեպքը չի, որ մեզանից հետո՝ թեկուզ ջրհեղեղ: Բնականաբար, շատ լավ վիճակում ենք մարզը փոխանցելու հաջորդ մարզպետին: Ես համոզված եմ, որ նա շատ նորմալ պայմաններում կարող է իր աշխատանքն սկսել:

- Ձեր պաշտոնավարման ընթացքում եղել են խնդիրներ, որոնք այդպես էլ չկարողացաք լուծել, և արդյո՞ք նոր մարզպետը կարող է դրանք լուծել:

- Մարզպետի և մարզպետարանի գործառույթները մենք յուրաքանչյուր տարի կատարել ենք 100 տոկոսով: Իսկ ինչ վերաբերում է մնացած ոլորտային խնդիրներին, այդ թվում նաև սոցիալական վիճակին, պետք է ասեմ, որ ինչպես հանրապետության բոլոր մարզերում, այնպես էլ Լոռու մարզում, իհարկե, խնդիրներ կան և կլինեն:

- Լոռու մարզում Ձեր պաշտոնավարման տարիներին քրեական դեպքերը շատ էին...

- Հարցը ուղղեք ավելի ճիշտ հասցեատերերին, ուժային կառույցներին: Իմ գործառույթների մեջ նման խնդիր չի եղել:

- Նոր մարզպետի հետ համագործակցության պատրա՞ստ եք՝ խորհուրդներով կամ այլ ձևով:

- Իհարկե, ես ինքս լոռեցի եմ, ես որևէ գնալու տեղ չունեմ, և ապրելով նույն մարզում՝ պատրաստ եմ ամեն ինչով աջակցել, օգնել, օժանդակել: