Թրամփը չեղարկեց Կիմ Չեն Ընի հետ հանդիպումը, քանի որ վախենում էր, որ նա իրենից առաջ կչեղարկեր գագաթնաժողովը. NBC

12:03 • 25.05.18

ԱՄՆ նախագահ Դոնալդ Թրամփը վախենում էր, որ ԿԺԴՀ առաջնորդ Կիմ Չեն Ընն իրենից առաջ կչեղարկի իրենց սպասվող հանդիպումը, և այդ պատճառով որոշել է առաջ անցնել Հյուսիսային Կորեայի առաջնորդից, հայտնում է NBC-ն՝ վկայակոչելով իր աղբյուրներին:

Նշվում է, որ գագաթնաժողովը չեղարկելու մասին որոշումը, որը պետք է տեղի ունենար Սինգապուրում հունիսի 12-ին, անսպասելի է եղել Սպիտակ տան վարչակազմի համար:

«Դեռ երեկ ոչ մի բան չէր ակնարկում այն մասին, որ դա (գագաթնաժողովի չեղարկումը) տեղի կունենա»,- ասել է աղբյուրը, որը զբաղվել է երկրների առաջնորդների անձնական հանդիպման պատրաստությամբ:

NBC-ի տեղեկություններով՝ գագաթնաժողովը չեղարկելու մասին որոշումը պետքարտուղար Մայք Պոմպեոյի բացասական արձագանքին է արժանացել, որն այս տարի երկու անգամ մեկնել է Փհենյան՝ Հյուսիսային Կորեայի իշխանությունների հետ բանակցությունների համար:

Ավելի վաղ հաղորդվել է, որ Միացյալ Նահանգների նախագահ Դոնալդ Թրամփը չեղարկել է հունիսի 12-ին Սինգապուրում Հյուսիսային Կորեայի առաջնորդ Կիմ Չեն Ընի հետ կայանալիք պատմական հանդիպումը:


Այսօր հաղորդվել է, որ Հյուսիսային Կորեան պատրաստ է ցանկացած պահի, ցանկացած ձևաչափով Միացյալ Նահանգների հետ բանակցություններ անցկացնել։ Այդ մասին ասել է Հյուսիսային Կորեայի արտաքին քաղաքական գերատեսչության ղեկավարի տեղակալ Կիմ Կե Հվանը:

«Մենք ԱՄՆ-ի հետ բանակցային սեղանի շուրջ նստելու ու ցանկացած ժամանակ ցանկացած ձևաչափով հարցերը լուծելու պատրաստակամություն ենք հայտնում»,-ասել է պաշտոնյան: