Օտարերկրացիները 71 անգամ ոստիկանություն են դիմել Կիևում Չեմպիոնների լիգայի եզրափակչի անցկացման ընթացքում

19:16 • 27.05.18

Կիևում ՈւԵՖԱ-ի Չեմպիոնների լիգայի եզրափակիչ խաղի անցկացման ժամանակ Ուկրաինայի ոստիկանական մարմիններում 71 դիմում է ստացվել արտասահմանցիներից, որոնցից 20-ը քրեական իրավախախտման տարրեր են պարունակում:

Ինչպես տեղեկացնում է INTERFAX.RU-ն՝ մեջբերելով Ուկրաինայի Ազգային ոստիկանության հաղորդակցման բաժնի հայտարարությունը, 4 հաղորդում է ստացվել Կիևի ենթակառուցվածքների ականապատման մասին: Բոլոր առկա դիմումներով ստուգումներ են իրականացվում:

Բացի այդ, Կիևում հերթապահություն իրականացնող ոստիկանները ձերբակալել են մարզադաշտի մոտակայքում արտասահմանցի զբոսաշրջուհուն կողոպտած չարագործներին:

Ինչպես նշվում է ոստիկանական հաղորդագրության մեջ, ֆուտբոլային հանդիպումն առանց լուրջ խախտումների անցել:

Հիշեցնենք, որ մայիսի 26-ին Կիևում կայացել է Ռեալ-Լիվերպուլ հանդիպումը, որում 3:1 հաշվով հաղթանակ է տարել արքայական ակումբը՝ երրորդ տարին անընդմեջ նվաճելով Չեմպիոնների լիգայի գավաթը: