Այժմ կոռուպցիոն ռիսկերը արմատախիլ անելու պատմական պահն է, եթե հիմա էլ դա չանենք, ուրեմն ձախողում ենք ընդհանրապես ամեն ինչ. ՊԵԿ նախագահ
Պետական եկամուտների կոմիտեի նախագահ Դավիթ Անանյանը չի կարող ասել, թե արդյոք ՊԵԿ բարձրաստիճան պաշտոնյաները տեղյակ են եղել մաքսայինում կատարված չարաշահումներից, ներմուծման համար առանձին գումար վճարելուց և այլն: Նա լրագրողների հետ զրույցում ասաց, թե այսօր ժամանակն է ամեն ինչ անել, որպեսզի վերջնականապես այս համակարգից արմատախիլ արվի կոռուպցիան։
«Ես իմ նշանակման օրվանից հետո կարող եմ հայտարարել, որ եթե նման իրավիճակներ ու երևույթներ նույնիսկ եղել են, հայտնի է եղել իրենց, հայտնի չեն եղել, մենք բոլորով՝ հանրության հետ միասին, պետք է պայքարենք այդ ամենի դեմ: Թե որքանո՞վ համակարգը դրան անդրադարձ կկատարի, կամ հետադարձը որքանո՞վ ցավոտ կլինի, մենք դրան ականատես կլինենք»,- ասաց նա:
Անանյանը տեղյակ է մամուլում մի շարք հրապարակումներից, որ այս համակարգում շատ են եղել, ինչպես ինքը որակեց, «չայեվոյների» մասին հրապարակումներ, բայց այսօր հայտարարում է, նման կոռուպցիոն ռիսկերը պետք է արմատախիլ անել:
«Հիմա այն պատմական իրավիճակն է, երբ կարելի է դա անել, երբ հնարավորություն կա դա անելու, և եթե մենք հիմա էլ դա չանենք, կարող եմ ասել, որ մենք ուրեմն ձախողում ենք ընդհանրապես ամեն ինչ, ինչ մեզ համար արժեք ունի: Թե նախկինում ինչ է եղել, նախկինում շատ բան կարող էր լինել, բայց հիմա, եթե ես օրինակ պարզեմ, որ մայիսի 18-ից հետո որևէ մեկն ինչ-որ բան է արել, ինքը խիստ կպատժվի՝ ընդհուպ մինչև ազատազրկում»,-շեշտեց Դավիթ Անանյանը:
ՊԵԿ նախագահը, անդրադառնալով հարցին, թե արդյոք պե՞տք չեն կադրային փոփոխություններ, որպեսզի նախկինում կոռումպացվածները հեռացվեն համակարգից, ասաց, որ արմատական կադրային փոփոխություններ ՊԵԿ-ում արվել են:
Ինչ վերաբերում է լուրերին, թե ՊԵԿ նախկին նախագահ Վարդան Հարությունյանը «փախել է» Հայաստանից, Անանյան ասաց, թե ինքը տեղյակ չէ՝ Հարությունյանը ԱԱԾ-ի կողմից հետապնդվո՞ւմ է, թե ոչ։
«Այդպիսի տեղեկություն չունեմ։ Ինչքանով գիտեմ՝ երկրում չէ, բայց այդ եզրույթը՝ փախած է, փախած չէ, չէի օգտագործի», - ասաց Անանյանը:
Նա ընդգծեց, որ ինքը ՊԵԿ աշխատակից է և ՊԵԿ նախկին աշխատակիցների գտնվելու մասին հարցերը իրեն չէ, որ պետք է ուղղել։
«Ես ամեն օր, երբ ինձ պետք է, զանգահարում եմ Վարդան Հարությունյանին՝ ճշգրտելու ինչ-որ բան, որովհետև «handover» պրոցեսը պետք է շարունակվի։ Երբ զանգում եմ, ինքը հասանելի է»,- եզրափակեց Դավիթ Անանյանը:










