«Հերթական հակառուսական սադրանք», «տարվա կրկես». ՌԴ ԱԳՆ-ն ու օգտատերերն արձագանքել են Կիևում ռուս լրագրողի սպանության բեմադրությանը

11:17 • 31.05.18

Ռուսաստանի Դաշնության արտգործնախարարությունն անդրադարձել է Ուկրաինայում ռուս լրագրող Արկադի Բաբչենկոյի սպանության բեմադրմանը՝ այն անվանելով «հերթական հակառուսական սադրանք»։ ՌԴ ԱԳՆ-ն դատապարտել է Ուկրաինայի անվտանգության ծառայությանը՝ միջազգային հանրությանը մոլորեցնելու համար, հաղորդում է lenta.ru-ն:

«Ուկրաինական իշխանություններն ամբողջությամբ բռնել են ռուսաֆոբ ստի տարածման ուղին»,- նշել են նախարարությունում:

Գերատեսչությունից հայտնել են, որ ուկրաինական իշխանությունները փոխարենը պետք է զբաղվեն իրական հանցագործությունների հետաքննությամբ:

«Փաստում ենք, որ Ուկրաինայում կյանքի ու մահվան հարցերը, ինչպես նաև իր վարած քաղաքականության նկատմամբ միջազգային հանրության վստահությունը միայն մանրադրամ են հակառուսական հիստերիա ստեղծող Կիևի ռեժիմի համար»,- նշել են ԱԳՆ-ում:

«ՌԻԱ Նովոստի»-ի հաղորդմամբ՝ սոցցանցերի օգտատերերը նույնպես անդրադարձել են լրագրող Արկադի Բաբչենկոյի սպանության բեմադրությանը և լրագրողի «հարությանը»՝ տեղի ունեցածն անվանելով «Ուկրաինայի անվտանգության ծառայության հերթական կրկես» և «տարվա կրկես»:

Մայիսի 29-ին Ուկրաինայի ՆԳՆ-ն հայտնել էր, որ ռուս լրագրող Արկադի Բաբչենկոն, որը հայտնի է ՌԴ իշխանություններին ուղղված քննադատությամբ, սպանվել է Կիևում: Ուկրաինայի վարչապետ Վլադիմիր Գրոյսմանը Մոսկվային էր մեղադրել «սպանությանը» ներգրավվածության համար: Մայիսի 30-ին, սակայն, Ուկրաինայի անվտանգության ծառայությունը հայտարարել է, որ սպանությունը բեմադրություն է եղել, որն իրականացվել է գերատեսչության հատուկ գործողության շրջանակում: Ուկրաինան հայտարարել է, որ ռուսական հատուկ ծառայությունները երկու ամիս շարունակ պատրաստել են Բաբչենկոյի վրա հարձակումը։ Այժմ այս բեմականացմամբ ուկրաինական կողմը բացահայտել է սպանության ենթադրյալ կազմակերպչին ու ձերբակալել նրան: Ուկրաինայի անվտանգության ծառայության տվյալներով՝ նա Ուկրաինայի քաղաքացի է, որը հավաքագրվել է ռուսական հատուկ ծառայությունների կողմից: Սպանությունը կազմակերպելու համար նա պետք է ստանար 40 հազար դոլար: