Առաջին իսկ օրվանից ուսումնասիրել եմ նախարարության ֆինանսական հատվածը, տեսել եմ կոռուպցիոն հնարավոր ռիսկեր. սփյուռքի նախարար

18:10 • 01.06.18

Առաջիկա մի քանի օրերի ընթացքում կներկայացվի տեղեկատվություն, թե որտեղ ենք մենք տեսնում կոռուպցիոն ռիսկեր՝ ընթացիկ ծրագրերում, բյուջեում: Լրագրողների հետ զրույցում ասաց սփյուռքի նորանշանակ նախարար, վարչապետ Նիկոլ Փաշինյանի թիմակից Մխիթար Հայրապետյանը:

Միայն դրանից հետո, նրա խոսքով, իրենք կհասկանան՝ դիմո՞ւմ են իրավապահ մարմիններին, թե ոչ: «Փորձում ենք հասկանալ, թե որոնք են խախտումները, բայց իրական գործեր դեռևս չկան»,- ասաց նախարարը:


Մխիթար Հայրապետյանը նշեց, որ ինքը, ի տարբերություն նախորդ նախարարի, սփյուռքահայերին չի դիմելու բանկերում գումար գցելու կոչով, նա ավելացնելու է երիտասարդական ծրագրերի ծավալները:

«Գիտահետազոտական կառույցներ պետք է ստեղծվեն նախարարությանը կից, կառուցվածքային փոփոխություններ պետք է լինեն նախարարության ներսում: Առաջիկա չորս կամ հինգ օրում մամուլի ասուլիս կհրավիրենք՝ ծրագրերի ժամկետներ անելու, ծրագրեր ներկայացնելու մասին»,- նշեց նա:

Հայրապետյանը չպատասխանեց այն հարցին, թե արդյոք գո՞հ է նախորդ նախարարի աշխատանքից, թե ոչ:


«Ես առաջին իսկ օրվանից ուսումնասիրել եմ ծրագրերի ֆինանսական հատվածը, ունեմ մտավախություններ, տեսել եմ կոռուպցիոն հնարավոր ռիսկեր: Եթե կարողանանաք առավել արդյունավետ օգտագործել դրանք, նախորդ ծրագրերը կկարողանանք շարունակել: Եթե տասը տարի շարունակ նույն ընկերությունները շահել են մրցույթները, և ընթացիկ ծրագրերը պետք է նույն կազմակերպություններն անեն, այստեղ խնդիր կա: Եթե կարողանանք մրցույթներ հայտարարել՝ բաց, թափանցիկ, ապա կշարունակենք ծրագրերը»,- շեշտեց նախարարը:

Նա հավաստիացրեց, որ կաշկանդված չէ իր գործողություններում և առաջիկայում ներկայացնելու է ուսումնասիրությունների արդյունքները:

 

Խոսելով ակնկալիքների մասին, որ հեղափոխությունից հետո ներգաղթ կլինի՝ Մխիթար Հայրապետյանը պատասխանեց, որ շատ են լուրերն այն մասին, որ բազմաթիվ հայեր վերադառնում են:

Նա ասաց, որ ամեն դեպքում հայրենադարձություն ասելով իրենք նկատի են ունեցել ինստիտուցիոնալ հայրենադարձությունը. «Այո, Սերժ Սարգսյանը գնաց, նոր կառավարություն ձևավորվեց, բայց չես կարող հայտարարել մեծ ներգաղթի մեկնարկի մասին, եթե չկան համապատասխան պայմաններ: Երբ մենք վստահ կլինենք, որ հայրենադարձվածը կգա ու կինտեգրվի հանրությանը, կապահովվի աշխատատեղերով, կեցության վայրերով… Մենք ունենք քաղաքական կամք հավասար պայմաններ ապահովելու, բիզնեսի համար լավ միջավայր ստեղծելու համար»: