ՀՀ ՊՆ-ն Նախիջևանի սահմանից որևէ վտանգ չի տեսնում, իրավիճակն ամբողջովին վերահսկելի է. Դ. Տոնոյան (տեսանյութ)

12:47 • 01.06.18

ՀՀ ՊՆ-ն Ադրբեջանի ԶՈւ-ի տեղափոխման հետ կապված ոչ մի մտահոգություն չունի, քանի որ իրավիճակն ամբողջովին վերահսկելի է: Այսօր կառավարությունում լրագրողների հետ զրույցում նման հայտարարություն արեց պաշտպանության նախարար Դավիթ Տոնոյանը՝ հավելելով, որ հայկական կողմն արդյունավետ գործողություններով չեզոքացնում է ցանկացած խնդիր: 

«Բոլորը պետք է գիտակցեն, որ ադրբեջանական կողմն իրենց տարածքում իրականացնում է որոշակի տեղափոխումներ: Դա Նախիջևանի տարածքն է: Այս պահին ոչ մի միջամտության կարիք չկա»,-ասաց նա:

Տոնոյանը հորդորեց իրավիճակը սթափ գնահատել և շեշտեց, որ ՀՀ ՊՆ-ն որևէ վտանգ Նախիջևանի սահմանից չի տեսնում: Ինչ վերաբերում է իր և ԱԳ նախարար Զոհրաբ Մնացականյանի՝ Նախիջևան սահման կատարած այցին, Տոնոյանն ասաց, որ ԱԳ նախարարը պարզապես ցանկանում էր անձամբ ծանոթանալ իրավիճակին: 

Նրա խոսքով՝ Արցախի սահմանում էլ անսովոր երևույթներ չեն կատարվում՝ հայկական կողմն ամբողջովին վերահսկում է իրավիճակը:

Նախարարը, խոսելով ՀՀ-ում հեղափոխության օրերին տարածվող լուրերի մասին, թե սահմանում հակառակորդի ԶՈւ կուտակումներ է նկատվում, ասաց. «Կարծում եմ, որ դա ավելի շատ մտահոգություն է եղել Ադրբեջանի կողմից՝ կապված մեր ներքաղաքական իրավիճակի հետ: Սա ավելի շատ քաղաքական գնահատման խնդիր է, բայց կային կուտակումներ, ինչը նաև բացատրվում է նրանով, որ Ադրբեջանը մտահոգվում էր, թե մեր կողմից կարող է սադրանք լինել»: 

Դավիթ Տոնոյանն անդրադարձավ նաև վարչապետ Նիկոլ Փաշինյանի՝ պարտադիր զինվորական ծառայության անցնելու ուղղված կոչին և հայտարարեց, թե արդեն իսկ կոչին արձագանքել են: Նա դիմումների քանակը չհրապարակեց, բայց շեշտեց, որ դիմումներ կան նաև արտերկրում գտնվող մեր հայրենակիցներից:

«Յուրաքանչյուր դիմում պետք է ուսումնասիրվի, ինդիվիդուալ մոտեցում է լինելու: Վարչապետի հանձնարարական էլ կա, որ հնարավորինս ստեղծվեն այնպիսի պայմաններ, որ հետախուզման մեջ գտնվող մեր հայրենակիցների՝ բանակում ծառայելու ցանկությունն իրականացնելը հեշտացվի»,- շարունակեց Դավիթ Տոնոյանը:

Ինչ վերաբերում է Զինված ուժերի խաղաղապահ բրիգադի մի խումբ զինծառայողների կողմից զորամասը լքելուն և հեղափոխությանը միանալուն, Դավիթ Տոնոյանն ասաց, թե ծառայողական քննությունը մոտենում է ավարտին և շուտով արդյունքները պարզ կլինեն: Միևնույն ժամանակ նշեց, որ քրեական հետապնդման խնդիր չկա: