Ստեփանակերտում ուժային կառույցների ղեկավարների հրաժարականի պահանջով բողոքի ակցիաները շարունակվում են (լուսանկարներ, թարմացված)

11:48 • 03.06.18

15:30

Արցախի «Ազգային վերածնունդ» կուսակցության վարչության անդամ Տիգրան Գրիգորյանը «Ֆեյսբուքում» գրում է, որ Ստեփանակերտի ավտոկայանի մոտ բողոքի ակցիա իրականացնող քաղաքացիները հնչեցնում են Հայաստանի բոլոր քաղբանտարկյալներին ազատ արձակելու կոչեր:

Նա նաև հայտնում է, որ ցույցի վայրում հայտնվել են ինքնաեռեր, որոնք նախկինում եղել էին միայն 1988 թ.-ի Արցախյան շարժման ընթացքում: Ինչպես նաև տարբեր մարդիկ իրենց նախաձեռնությամբ նոր պաստառներ են պատրաստում։ 

«Շատանում են Արցախը ՀՀ-ի հետ միավորելու կոչերը։ Նոր մի մարդ բողոքում էր «սահմանին» գտնվող մաքսատներից»,- գրում է Տիգրան Գրիգորյանը:

 





14:50

Ստեփանակերտի ավտոկայանում հավաքված ցուցարաների մոտ է ժամանալ «Երկիր ծիրանի» կուսակցության առաջնորդ Զարուհի Փոստանջյանը:

«Հայաստանը և Արցախը միասնական պետություն են, և միասնական պետությունը պետք է ունենա միասնական քաղաքական օրակարգ: Ընտրելու և ընտրվելու իրավունքն Արցախում նույնպես պետք է վերականգնվի, որը շուրջ 30 տարի սահմանափակվել է»,- արցախցիների հետ հանդիպմանը հայտարարեց Զարուհի Փոստանջյանը:




13:35

Ինչպես հաղորդում է civilnet.am-ը, Ստեփանակերտի Վերածննդի հրապարակում հավաքվածները հակացույց են անում: Նրանք պահանջում են, որ ուժային կառույցների ղեկավարները մնան իրենց պաշտոններում՝ «Ուժայինները մեր ուժն են» պաստառներով։

Իսկ Ստեփանակերտի ավտոկայանի մոտ հավաքված ցուցարարներին մոտեցել է Արցախի մարդու իրավունքների պաշտպան Ռուբեն Մելիքյանը:




12:50

Ստեփանակերտի ավտոկայանից բացի, քաղաքացիների մեկ այլ խումբ է հավաքվել նաև մայրաքաղաքի Վերածննդի հրապարակում:

Արցախցի լրագրող Մարութ Վանյանը լուսանկար է հրապարակել՝ կատարելով հետևյալ գրառումը.

«Մարդկանց բազմություն է հավաքվել Վերածննդի հրապարակում։ Պաստառներ. Պահանջում ենք ոստիկանապետի հրաժարականը»:







---------------------------

Այսօր՝ առավոտյան ժամը 10:00-ից, Ստեփանակերտի ավտոկայանի մոտ շարունակվում են բողոքի ակցիաները՝ ուժային կառույցների ղեկավարների հրաժարականի պահանջով:

Այս մասին Tert.am-ին հայտնեց ԱՀ ԱԺ նախագահի տեղակալ Վահրամ Բալայանը:

«Ազգային ժողովը քննիչ հանձնախումբ է ստեղծել, և նպատակ ունենք ոչ միայն կատարված իրադարձությունները քննարկել, այլև ընդհանրապես հասարակությանը հուզող, ցավոտ հարցերը, որոնք ժամանակի ընթացքում լուծումներ չեն ստացել, փորձենք լուծումներ ապահովել: Սա է մեր հիմնական նպատակը»,- նշեց Վահրամ Բալայանը:



Արցախի ԱԺ-ի փոխնախագահը պատրաստվում է մեկնել Ստեփանակերտի ավտոկայան՝ հանդիպելու համար բողոքող քաղաքացիների հետ:

Ստեփանակերտում բողոքի ակցիա իրականացնող քաղաքացիները առաջնահերթ պահանջում են ԱԱԾ տնօրենի տեղակալ Գագիկ Սարգսյանի, ստորաբաժանման հրամանատար Աշոտ Գրիգորյանի և ոստիկանապետ Կամո Աղաջանյանի հրաժարականները:

Նշենք, որ Արցախի Հանրապետության նախագահ Բակո Սահակյանը հունիսի 2-ին հրավիրել է խորհրդակցություն, որին մասնակցում էին Անվտանգության խորհրդի անդամները, Ազգային ժողովի նախագահի տեղակալը, խմբակցությունների ղեկավարները ու մշտական հանձնաժողովների ներկայացուցիչները։

Խորհրդակցության ընթացքում քննարկվել են Ստեփանակերտում տեղի ունեցած միջադեպին վերաբերող մի շարք հարցեր։ Երկրի ղեկավարը կարևորել է մանրակրկիտ ու պատշաճ մակարդակով հետաքննության անցկացման անհրաժեշտությունը և ընդգծել, որ հնարավորինս սեղմ ժամկետներում մեղավորները պետք է պատասխանատվության ենթարկվեն՝ օրենքով սահմանված կարգով։

Հիշեցնենք, որ հունիսի 1-ին Արցախի մայրաքաղաքում ԱԱԾ հատուկջոկատայինների և քաղաքացիների միջև ծեծկռտուք է տեղի ունեցել, ինչին հաջորդել է բողոքի ակցիա:

Վիճաբանության առիթը կենցաղային հարցերն են եղել, հատուկջոկատայիններն այդ պահին ծառայության մեջ չեն եղել: Այնուհետև քաղաքացիները փակել են Ազատամարտիկների փողոցը և իրավապահներից պահանջել ձերբակալել հատուկջոկատայիններին: 
Արցախի ոստիկանությանը միջադեպի վերաբերյալ հաղորդագրություն էր տարածել, որում ասվում էր, որ հունիսի 1-ին՝ ժամը 19։25-ին, ոստիկանության Ստեփանակերտի քաղաքային վարչության հերթապահ մաս ահազանգ է ստացվել այն մասին, որ Ստեփանակերտ քաղաքի Բաղրամյան 2բ շենքի դիմաց վիճաբանություն է տեղի ունենում:

Դեպքի վայր մեկնած օպերատիվ խումբը պարզել է, որ նույն օրը՝ ժամը 19:15-ի սահմաններում, նշված վայրում վիճաբանություն է առաջացել մի կողմից նույն քաղաքի բնակիչներ՝ 1981թ. ծնված Դ. Հ.-ի, 1983թ. ծնված Ա.Ա-ի, իսկ մյուս կողմից՝ 1985թ. ծնված Մ.Մ-ի (ԱԱԾ ծառայող) միջև, որի ընթացքում կողմերը փոխադարձ հարվածներ են հասցրել միմյանց՝ պատճառելով մարմնական վնասվածքներ: 

ԱՀ ոստիկանության՝ ՔՀՎ ծառայողների հետ համատեղ ձեռնարկված միջոցառումներով, վիճաբանությանը մասնակցելու կասկածանքով ոստիկանության Ստեփանակերտի քաղաքային վարչություն բերման են ենթարկվել 15 քաղաքացիներ: