Վենեսուելայի իշխանություններն ազատ են արձակել ևս 40 ձերբակալված ընդդիմադիրի

12:05 • 03.06.18

Վենեսուելայի իշխանություններն ազատ են արձակել ձերբակալված ընդդիմադիրների երկրորդ խմբին, որի մեջ է մտել 40 մարդ: Այդ մասին հայտնել է երկրի գլխավոր դատախազ Տարեկ Վիլյամ Սաաբը, հաղորդում է ТАСС գործակալությունը:

«Դա նոր փուլ է, որը կշարունակվի հաջորդ շաբաթ»,- ասել է նա:

Ուրբաթ Վենեսուելայի սահմանադրական ժողովի նախագահ Դելսի Ռոդրիգեսը հայտարարել է, որ երկրի իշխանություններն սկսել են ազատ արձակել «քաղաքական բռնության» համար ձերբակալվածների առաջին խմբին: Ավելի ուշ երկրի գերագույն դատարանը հրապարակել է ազատ արձակվածների ցանկը, որի մեջ է ներառվել 39 մարդ:

Իր վերընտրվելուց հետո Վենեսուելայի նախագահ Նիկոլաս Մադուրոն դիմել է Սահմանադրական ժողովին՝ առաջարկելով ազատ արձակել մի քանի ընդդիմադիրների ազգային հաշտեցման համար: «Վենեսուելական քրեական ֆորում» ոչ կառավարական կազմակերպության գնահատականներով՝ երկրում կալանքի տակ է մնում ավելի քան 300 քաղբանտարկյալ: