ԱԻՆ-ը կոռուպցիոն երկու դեպքի վերաբերյալ նյութեր է ուղարկել ԱԱԾ. Հրաչյա Ռոստոմյան
Արտակարգ իրավիճակների նախարարությունում հայտնաբերվել է երկու կոռուպցիոն դեպք, նյութերը ուղարկվել են Ազգային անվտանգության ծառայությանը: Այս մասին լրագրողների հետ զրույցում ասաց Արտակարգ իրավիճակների նախարար Հրաչյա Ռոստոմյանը:
Նախարարը չմանրամասնեց, թե կոնկրետ ինչ կոռուպցիոն սխեմայի մասին է խոսքը և որ նախարարի պաշտոնավարման ժամանակահատվածում է եղել:
«Ասացի՝ այս պահի դրությամբ երկու դեպք է արձանագրվել, գործը ԱԱԾ-ում է, քննություն է ընթանում, ինձ ուրիշ հարցեր տվեք»,-ասաց նա:
Հրաչյա Ռոստոմյանը նաև նշեց, որ նախկին նախարար Դավիթ Տոնոյանից հիմնականում լավ ժառանգություն է ստացել, իսկ խնդիրերն էլ կապված են հակակարկտային և սեյսմիկ կայանների վերազինման, արդիականացման հետ:
Նախարարը չհամաձայնեց լրագրողների դիտարկման հետ, թե ԱԻՆ կադրերն իրեն չեն ընդունում, նրա հետ չեն ցանկանում աշխատել: Հրաչյա Ռոստոմյանը ընդգծեց նաև, որ ինքնանպատակ կադրային փոփոխություններ նախարարությունում չեն լինելու:
«Եթե մարդը բարի համբավ և աշխատելու ցանկություն ունի, բնականաբար շարունակելու ենք միասին աշխատել»,-եզրափակեց նախարարը:










