Նիդեռլանդներում դատարանը կալանք է սահմանել «Գազպրոմ»-ի նիդեռլանդական ակտիվների նկատմամբ. ռուսական ընկերությունն արձագանքել է
Նիդեռլանդներում դատարանը կալանք է սահմանել ռուսական «Գազպրոմ» ընկերության նիդեռլանդական ակտիվների նկատմամբ՝ ուկրաինական «Նավթոգազ»-ին Ստոկհոլմի արբիտրաժային դատարանի որոշմամբ 2,6 միլիարդ դոլար վճարելու համար: Այդ մասին հայտնում է «ՌԻԱ Նովոստի»-ն՝ վկայակոչելով ուկրաինական ընկերությանը:
Նշվում է, որ դատական կատարածուները նաև «գործողություններ են անցկացնում» Nord Stream AG-ում և Nord Stream 2 AG-ում ռուսական ընկերության ակտիվները սառեցնելու համար: Համապատասխան միջնորդությունները «Նավթոգազ»-ը ներկայացրել էր անցած շաբաթ:
«Նիդեռլանդական դատարանը բավարարել է այդ միջնորդությունները, բայց Նիդեռլանդներում «Գազպրոմ»-ի յոթ դուստր ընկերություններից վեցը հրաժարվել են համագործակցել դատական կատարածուների հետ: Դա, սակայն, ոչ մի կերպ չի ազդի կալանքի վրա»,- հայտնել են ուկրաինական ընկերությունում:
«Նավթոգազ»-ի խորհրդի նախագահ Անդրեյ Կոբոլևը հայտարարել է, որ ընկերությունը «կձեռնարկի բոլոր հասանելի օրինական միջոցներն ու գործիքները» «Գազպրոմ»-ից 2,6 միլիարդ դոլարը ստանալու համար:
Հիշեցնենք, որ փետրվարի 28-ին Ստոկհոլմի արբիտրաժային դատարանը պարտավորեցրել է «Գազպրոմ»-ին ուկրաինական կողմին 4.6 միլիարդ դոլար վճարել տարանցման մասին պայմանագրով գազի ոչ բավականաչափ ծավալներ մատակարարելու համար: Հաշվի առնելով մեկ այլ վեճի վերաբերյալ որոշումը, որի համաձայն՝ «Նավթոգազ»-ը ռուսական ընկերությանը երկու միլիարդ դոլար է պարտք, «Գազպրոմ»-ը պետք է ուկրաինական կողմին վճարի 2.56 միլիարդ դոլար:
Նշենք, որ ռուսական ընկերությունն արդեն արձագանքել է այս որոշմանը։ «Գազպրոմ»-ին հայտնի է Նիդեռլանդներում Ստոկհոլմի արբիտրաժային դատարանի որոշման հարկադիր կատարման ուղղությամբ «Նավթոգազ»-ի գործողությունների մասին, բայց պաշտոնական ծանուցում դեռ չի ստացել: Ընկերությունը հայտնել է, որ կկարողանա այդ հարցի վերաբերյալ մանրամասն մեկնաբանություն տալ միայն փաստաթղթերի մանրամասն ուսումնասիրությունից հետո:










