Վահրամ Շահինյանն ազատվեց Հատուկ քննչական ծառայության պետի պաշտոնից
Այսօր ժամանակավոր, համաձայնության կառավարության նիստին ՀՀ առաջին փոխվարչապետ Արարատ Միրզոյանը ներկայացրեց Վահրամ Շահինյանին Հայաստանի Հանրապետության Հատուկ քննչական ծառայության պետի պաշտոնից ազատելու մասին որոշման նախագիծը:
Ըստ նախագծի՝ ղեկավարվելով «Հատուկ քննչական ծառայության մասին» օրենքի 9-րդ հոդվածի 1-ին մասով և 12-րդ հոդվածի 1-ին մասի 2-րդ կետով՝ Հայաստանի Հանրապետության կառավարությունը որոշում է Վահրամ Շահինյանին ազատել Հայաստանի Հանրապետության Հատուկ քննչական ծառայության պետի պաշտոնից՝ իր դիմումի համաձայն:
Հիշեցնենք, որ Վահրամ Շահինյանը հրաժարականի դիմում էր ներկայացրել հունիսի 6-ին:
«Հպարտ լինելով ծառայության նշված և մյուս ձեռքբերումների համար` այդուհանդերձ, հարկ եմ համարում հայտնել, որ ստեղծված հանգամանքների բերումով այլևս նպատակահարմար չեմ գտնում շարունակել իմ հետագա ծառայությունը: Շնորհակալություն եմ հայտնում իմ բոլոր գործընկերներին 5 տարվա համատեղ անձնվեր աշխատանքի համար»,- հայտնել էր ՀՔԾ արդեն նախկին պետը:










