Գվատեմալայի բնակչուհին հրաբխի ժայթքման հետևանքով կորցրել է մեծ ընտանիքի 50 անդամի (լուսանկարներ, տեսանյութ)
Գվատեմալայի բնակչուհի Էուֆեմիա Գարսիան Ֆուեգո հրաբխի ուժգին ժայթքման հետևանքով կորցրել է մեծ ընտանիքի 50 անդամի:
Ինչպես նշում է Daily Mail-ը, հրաբխից ժայթքած մոխիրը թափվել է կնոջ ու նրա բարեկամների տների վրա՝ թաղելով նրա մեծ ընտանիքի անդամներին:
Հիշեցնենք, որ Ֆուեգոյի ժայթքման հետևանքով զոհվել է առնվազն 110 մարդ: Հրաբխային մոխիրը, փոշին ու լավան թափվել են մոտակա բնակավայրերի վրա, ինչից հետո անհետ կորած է համարվում մոտ 200 մարդ: Նրանց թվում են նաև Գարսիայի 9 քույր-եղբայրները, նրանց ընտանիքները, մայրը, երեխաներն ու թոռը:
Աղբյուրը մանրամասնում է, որ տվյալ բնակավայրերում որոնողափրկարարական աշխատանքները պաշտոնապես դադարեցվել են, ուստի՝ ողջ մարդ գտնելու հավանականություն գրեթե չկա:
Նշվում է, որ 48-ամյա կինն ամեն առավոտ դուրս է գալիս ապաստարանից ու գնում վտանգի գոտի, որտեղ կամավորների ու իրենց հարազատներին կորցրած այլ մարդկանց հետ փորձում է գտնել ողջ մնացածներին կամ մահացածների դիերը:
«Ընտանիքս՝ բոլոր 50-ն էլ, թաղված է մոխրի տակ: Ես չեմ հանգստանա, քանի դեռ չեմ գտել նրանց մարմիններն ու քրիստոնեական կարգով չեմ հուղարկավորել»,-ասել է կինը:


















