Վերաքննիչ դատարանը Սեֆիլյանի ու մյուսների վերաբերյալ որոշումը կհրապարակի հունիսի 13-ին. նիստն ավարտվեց (տեսանյութ)
13:57
Վերաքննիչ քրեական դատարանում ավարտվեց Ժիրայր Սեֆիլյանի և մյուսների վերաքննիչ բողոքների քննությունը։ Ամբաստանյալների պաշտպանները պահանջում են բեկանել առաջին ատյանի դատարանի դատավճիռը, մեղադրող կողմը երեք ամբաստանյալի՝ Սեֆիլյանի,Սաֆարյանի ու Գրիգորյանի նկատմամբ մի շարք մեղմացնող հանգամանքներ նշեց և համապատասխանաբար միջնորդեց Սեֆիլյանին դատապարտել 7 տարի ազատազրկման,Սաֆարյանի նկատմամբ պատիժը պայմանականորեն չկիրառել, իսկ Գալուստ Գրիգորյանին դատապարտել 3 տարի ազատազրկման։
Դատարանը գնաց խորհրդակցական սենյակ դատական ակտ կայացնելու, որը կհրապարակվի հունիսի 13-ին՝ ժամը 14։00-ին։
Դատական նիստն ավարտվեց։
13:33
Վերաքննիչ քրեական դատարանում վերաքննիչ բողոքի քննությունից հետո մեղադրող Պետրոս Պետրոսյանը, նշելով մի շարք մեղմացնող հանգամանքներ, ասաց, որ պահանջում է Ժիրայր Սեֆիլյանին դատապարտել ազատազրկման 7 տարի ժամկետով, Գալուստ Գրիգորյանին 4-ի փոխարեն դատապարտել 3,6 տարի ազատազրկման, իսկ Գևորգ Սաֆարյանի նկատմամբ սահմանված պատիժը պայմանականորեն չկիրառել։
Նշենք,որ պատիժը պայմանականորեն չկիրառելիս դատարանը հաշվի է առնում ամբաստանյալի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները:
Նշենք,որ Սեֆիլյանն առաջին ատյանի դատարանի կողմից դատապարտվել է 10 տարի 5 ամիս ազատազրկման։ Սեֆիլյանն ազատազրկված է 2016-ի հունիսից։
13:10
Վերաքննիչ քրեական դատարանում շարունակվում է Սեֆիլյանի և մյուսների գործով դատական նիստը։
Դատական նիստը 15 րոպեով ընդմիջվեց պաշտպան Եգորյանի բացակայության պատճառով, իսկ վերսկսելուց հետո ամբաստանյալ Սասունիկ Կիրակոսյանի պաշտպան Կարեն Հակոբյանը միջնորդեց փոխել իր պաշտպանյալի խափանման միջոց կալանավորումը։
«Միջնորդում եմ խափանման միջոցի հարցը քննարկել, որոշում կայացնել կալանավորումը վերացնելու մասին։ Իսկ եթե ոչ խնդրում եմ քննարկել ԱԺ «Ծառուկյան դաշինք» խմբակցության պատգամավորներ՝ Նաիրա Զոհրաբյանի և ԱԺ փոխնախագահ Միքայել Մելքումյանի անձնական երաշխավորությունը։ Նշեմ, որ պատգամավորները անձնական երաշխավորություն են ներկայացրել նաև Հրայր Թոփչյանի և Գալուստ Գրիգորյանի համար»,-ասաց պաշտպանը։
Պաշտպանական կողմը միացավ միջնորդությանը, իսկ մեղադրողները չառարկեցին միայն անձնական երաշխավորագրերին։
Նշենք,որ ԱԺ պատգամավորներ Նաիրա Զոհրաբյանն և Միքայել Մելքումյանը պատրաստականություն են հայտնել ապահովել ամբաստանյալի պատշաճ վարքագիծը։
Դատարանը խորհրդակցեց և որոշեց սույն միջնորդության քննարկումը հետաձգել։
Ժիրայր Սեֆիլյանի պաշտպան Տիգրան Եգորյանը դատարանին ներկայացրեց Ժիրայր Սեֆիլյանի խափանման միջոց կալանքը փոխելու վերաբերյալ միջնորդությունը, նշելով, որ իրենց անձնական երաշխավորությունն են ներկայացրել ԱԺ տասից ավելի պատգամավորներ։
«ԱԺ «Ծառուկյան դաշինք» խմբակցության պատգամավորներ Նաիրա Զոհրաբյանը, Միքայել Մելքումյանը,Վահե Էնֆիաջյանը, Վարդան Բոստանջյանը, Իվետա Տոնոյանը, Շաքե Իսայանը, Վարդևան Գրիգորյանը, Արթուր Մանուկյանը, Լուիզա Սարգսյանը, Սերգեյ Բագրատյանը և «Ելք»-ից Ալեն Սիմոնյանն անձնական երաշխավորագիր են ներկայացրել Սեֆիլյանի խափանման միջոց կալանքը փոխելու համար»,-հայտնեց Եգորյանը։
Մեղադրող Պետրոս Պետրոսյանը չառարկեց միջնորդությանը նկատի ունենալով ԱԺ պատգամավորների երաշխավորությունները։
Դատարանը տեղում խորհրդակցեց և որոշեց միջնորդությունների լուծումը հետաձգել։
Դատարանում շարունակում է քննվել վերաքննիչ բողոքները։
12:11
Վերաքննիչ քրեական դատարանում մեկնարկել է Ժիրայր Սեֆիլյանի, Գևորգ Սաֆարյանի, Հրայր Թոփչյանի, Սասունիկ Կիրակոսյանի, Գալուստ Գրիգորյանի, Ներսես Պողոսյանի վերաքննիչ բողոքների քննությունները: Նրանք պահանջում են բեկանել առաջին ատյանի դատարանի դատավճիռը և արդարացնել իրենց:
Նախորդ դատական նիստին ամբաստանյալներ Գևորգ Սաֆարյանի, Հրայր Թոփչյանի, Սասունիկ Կիրակոսյանի, Գալուստ Գրիգորյանի, Ներսես Պողոսյանի պաշտպանները նրանց խափանման միջոց կալանքը փոխելու միջնորդություններ ներկայացրին, սակայն Վերաքննիչ քրեական դատարանը դատավոր Ռուզաննա Բարսեղյանի նախագահությամբ նրանց կալանքից ազատելու վերաբերյալ միջնորդությունների լուծումը հետաձգեց:
ԱԺ «Ելք» խմբակցությունների պատգամավորներ Ալեն Սիմոնյանն և Հայկ Կոնջորյանն անձնական երաշխավորություն էին ներկայացրել Գևորգ Սաֆարյանին կալանքից ազատելու համար, իսկ ԱԺ «Ելք» խմբակցության պատգամավորների Լենա Նազարյանն ու Հրաչյա Հակոբյանը երաշխավորագիր են ներկայացրել նաև ամբաստանյալ Ներսես Պողոսյանի համար:
Հիշեցնենք, որ Ալեն Սիմոնյանն այսօր առավոտյան ասել էր, որ երաշխավորագիր է ստորագրել Ժիրայր Սեֆիլյանի խափանման միջոցը փոխելու համար։
Նախորդ նիստին խափանման միջոցը փոխելու միջնորդություն ներկայացրեց նաև Հրայր Թոփչյանի պաշտպանը: Նա միջնորդեց,որ պաշտպանյալի նկատմամբ խափանման միջոց ընտրվի ստորագրություն չհեռանալու մասին կամ կիրառվի 500 հազար դրամ գրավ` հաշվի առնելով պաշտպանյալի ֆինանսական վիճակը։
Դատարանին խափանման միջոց կալանավորումը փոխելու վերաբերյալ միջնորդություն ներկայացրեց նաև Գալուստ Գրիգորյանի պաշտպան Աննա Ջուվանովան։
Պաշտպանական կողմը միացավ միջնորդությանը, իսկ մեղադրող դատախազ Փանոսյանն ու Պետրոսյանն առարկեցին միջնորդությանը։
Նշենք, որ առաջին ատյանի դատարանի կողմից Ժիրայր Սեֆիլյանը դատապարտվել է 10 տարի 5 ամիս ազատազրկման, Գևորգ Սաֆարյանը՝ 4, միասնական պատիժը՝ 5,5 տարի, Սասունիկ Կիրակոսյանը՝ 4,6 տարի, Ներսես Պողոսյանը՝ 3,6 տարի, Հրայր Թոփչյանը՝ 3, Գալուստ Գրիգորյանը՝ 4 տարի, Հովհաննես Պետրոսյանը 2 տարի ժամկետով: Հովհաննես Պետրոսյանի պատժի կրման ժամկետն ավարտվել է և նա մայիսի 31-ին ազատ է արձակվել քրեակատարողական հիմնարկից:
Հիշեցնենք, որ Ժիրայր Սեֆիլյանին մեղադրանք էր առաջադրվել ՀՀ ՔՕ-ի 35-225-րդ հոդվածի 1-ին մասի, 35-225-րդ հոդվածի 1-ին մասի, 35-219-րդ հոդվածի 3-րդ մասի 1-ին կետի հատկանիշներով, որոնցում ճանաչվեց մեղավոր:
Մեղադրական եզրակացության մեջ ասվում էր, որ Սեֆիլյանը մի խումբ անձանց հետ նախնական համաձայնությամբ, 2015 թվականի ապրիլի 24-ին Երևանում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ, բացի այդ, 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել և փոխադրել հրազեն և ռազմամթերք` նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել և պահել ռազմավարական նշանակության շենքեր, շինություններ, սակայն իր կամքից անկախ հանգամանքներով ավարտին չի հասցվել:
Մյուս ամբաստանյալները՝ Սասունիկ Կիրակոսյանը, Ներսես Պողոսյանը, Հրայր Թոփչյանը, Գալուստ Գրիգորյանը և Հովհաննես Պետրոսյանը մեղավոր ճանաչվեցին ՀՀ ՔՕ-ի 235-րդ հոդվածի 3-րդ մասով նախատեսված արարք կատարելու մեջ՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը կազմակերպված խմբի կողմից:
Գևորգ Սաֆարյանը մեղավոր է ճանաչվել ՀՀ ՔՕ-ի 35-225-րդ հոդվածի 1-ին մասով նախատեսված արարք կատարելու մեջ՝ զանգվածային անկարգությունների նախապատրաստությունը:










