Կանխամտածված ու միտումնավոր ապատեղեկատվություն են տարածում իմ մասին. Երևանի թիվ 19 պոլիկլինիկայի տնօրեն

17:50 • 12.06.18

Երևանի ավագանու «Ելք» խմբակցության 4 անդամները՝ Դավիթ Խաժակյանը, Թեհմինա Վարդանյանը, Անի Խաչատրյանն ու Անի Սամսոնյանն առանց փաստեր գնահատելու, կանխամտածված ու միտումնավոր ապատեղեկատվություն են տարածում իմ մասին: Այսօր լրագրողների հետ հանդիպմանը նման հայտարարություն արեց Երևանի թիվ 19 պոլիկլինիկայի տնօրեն Սամվել Սարգսյանը: Նրա խոսքով՝ ավագանու անդամների այցի ժամանակ բուժաշխատողները ներկայացրել են իրականությունը, ինքն էլ  իրավական ակտերն է ներկայացրել, սակայն, ըստ նրա, պարզաբանումները հաշվի չեն առնվել:

«Անպատկառ ու անամոթաբար, իրականությանը չհամապատասխանող, ստահոդ տեղեկություններ են տարածում՝ իմ բարի համբավը վիրավորելու, աշխատանքային գործունեության վրա ստվեր գցելու միտումով: Միայն մեկ աշխատակից է բողոքել, իսկ մյուսների ձայնը հաշվի չեն առել»,- ասաց նա

Տնօրենն, անդրադառնալով արձակուրդների հետ կապված այն դժգոհություններին, թե արձակուրդ ստանալու համար տնօրենի մոտ են գնում խմիչքով, ասաց, որ ինքն Երևանի ավագանու անդամներին ցույց է տվել  բոլոր աշխատողների՝ տարվա կտրվածքով կազմած արձակուրդային ժամանակացույցը, որտեղ 380 աշխատակից իր դիմումի համաձայն ընդգրկվել է ժամանակացույցի մեջ:

«Ինչ-որ կոնյակների հետ են կապում, միգուցե, իրենք են սովոր կոնյակներով հարցեր լուծել, մեզ մոտ այդպես չէ: Մեզ մոտ յուրաքանչյուր ստորաբաժանումում ղեկավարի անմիջական ղեկավարմամբ է որոշվում, թե ով ինչ ժամանակ է գնում, որից հետո տվյալները տարվում են կադրերի բաժին, ու կազմվում են ցանկերը»,- նշեց Սարգսյանը:

Ինչ վերաբերում է ընկերությունում վճարովի հիմունքներով բժշկական և սպասարկման օգնություն մատուցելուն, տնօրենն ասաց, թե իր համար ծիծաղելի է ավագանու «Ելք» խմբակցության անդամների դիրքորոշումը: Նա կասկածում է, որ ավագանու անդամները ծանոթ են հարկային օրենսդրությանը և ՀՀ իրավական ակտերի:

«Քաղաքացին ծառայություն ստանալուց առաջ պարտավոր է և պետք է վճարի այդ ծառայության համար: Բժշկական հիմնարկներում պետպատվերից դուրս իրագործվող, վճարովի հիմունքներով օգնություն կա: Շուրջ 130 բժիշկ-մասնագետից վճարովի հիմունքներով բուժսպասարկում իրականացնում է 34-40 մասնագետ: Այդ 34-40 աշխատակիցները 5.000 դրամից սկսած մինչև մի քանի հարյուր հազար դրամ վճարում են կատարում: Ամեն բան կախված է այդ մասնագետի պահանջարկից, մուտքագրված վճարներից 50-60  տոկոսն էլ հավելյալ գումարվում է աշխատավարձին»,- շեշտեց Սամվել Սարգսյանը:

Դիտարկմանը,  որ դատախազությունը թիվ 19 պոլիկլինիկայի վերաբերյալ հրապարակումներն ուղարկել է ոստիկանություն, և քրեական գործ է հարուցվել, Սարգսյանն արձագանքեց, որ հետաքննիչները զբաղվում են, ավելին՝ խոսել են իր ու 10-ից ավել աշխատակիցների հետ, որոնք, ըստ նրա, սուտ տեղեկություններ չեն  տվել:

Իրավաբան Արման Օհանյանն էլ հայտարարեց, թե Երևանի ավագանու «Ելք» խմբակցության անդամների գործողություններին պետք է իրավական գնահատական տրվի: Նա շեշտեց, որ գործ է հարուցվելու ոչ միայն քաղաքացիական օրենսգրքի հոդվածի շրջանակում, որը նախատեսում է անձին վիրավորելու ու զրպարտելու հետ կապված:

«Այստեղ մենք այլ ուղղություններով էլ խախտում ենք տեսնում, հնարավոր է, որ փոխվի պատասխանատվության դաշտը, և պատասխանատվության կանչվեն այն անձինք, ովքեր նախաձեռնել են այս ամենն՝ ունենալով քողարկված նպատակ»,- նշեց նա:

Օհանյանը նկատեց, որ Երևանի ավագանու «Ելք» խմբակցության անդամները հայտարարում էին, թե իրենք վերահսկողություն իրականացնելու լիազորություն ունեն և մեջբերեց օրենք, որտեղ շարադրված են ավագանու լիազորությունները՝ ապացուցելու, որ նման ստուգումների համար իրավունք չկար:

Կանանց կոնսուլտացիայի բաժնի վարիչ Աշոտ Ահարոնյանն էլ, համաձայնելով գործընկերների հետ, հավելեց, որ սուտ են այն տեղեկությունները, թե Սամվել Սարգսյանը հանդիպումների, ժողովների ժամանակ ստիպում է անջատել հեռախոսները  և այլն:

Ինչ վերաբերում է պոլիկլինիկայի ակնաբույժ Մետաքսյա Մելքոնյանին, ով ևս դժգոհություններ ուներ, տնօրենն ասաց,  որ նա շարունակում է աշխատել:

Ըստ նրա՝  ակնաբույժը լավ մասնագետ է, իսկ ինքը որոշակի  խնդիրների պատճառով լավ մասնագետին աշխատանքից չի  հեռացնի: Միևնույն ժամանակ Սամվել Սարգսյանը նկատեց, որ ակնաբույժն իր դեմ բողոքել է այն ժամանակ, երբ ինքը հայտնաբերել է, որ բժշկուհին բժշկական քարտեր չի լրացնում:

 

ՀեղինակԱնի Օհանյան