Հս. Կորեայի նկատմամբ ավելի վաղ սահմանված պատժամիջոցներն առայժմ կմնան ուժի մեջ, սակայն հետագայում կարող են չեղարկվել. Թրամփ
Հյուսիսային Կորեայի նկատմամբ ավելի վաղ սահմանված պատժամիջոցներն առայժմ կմնան ուժի մեջ, սակայն հետագայում կարող են չեղարկվել։ Նման հայտարարություն է արել ԱՄՆ նախագահ Դոնալդ Թրամփը Սինգապուրում Հս․ Կորեայի առաջնորդ Կիմ Չեն Ընի հետ հանդիպումից հետո, գրում է ТАСС գործակալությունը։
«Որոշ ժամանակ պատժամիջոցները կմնան ուժի մեջ։ Մենք երազում ենք ապագայի մասին, որում բոլոր կորեացիները կապրեն միասին ու ներդաշնակ, և նրանց հույսերը կվերածնվեն», - ասել է Թրամփը։
Նա նաև ակնարկել է, որ ԱՄՆ-ն «պատրաստ է պահում» Հս․ Կորեայի նկատմամբ «300 նոր պատժամիջոց»։
«Ժամանակի սղությունը թույլ չտվեց մեզ վերջնական փաստաթղթում ներառել մանրամասներ՝ կապված Հս․Կորեայի ապամիջուկայնացման քայլերի հետ, բայց դրանք կան»,- ասել է Թրամփը՝ շեշտելով, որ պատժամիջոցները վերջնականապես կչեղարկվեն միայն այն ժամանակ, երբ իրենք համոզված լինեն, որ միջուկային զենք այլևս գոյություն չունի։
ԱՄՆ նախագահը նաև խոստացել է դադարեցնել Կորեական թերակղզում Հարավային Կորեայի հետ համատեղ զորավարժությունները։ Նա ընդգծել է, որ թեև Հրվ․ Կորեան հոգում է այդ զորավարժությունների ծախսերի մի մասը, սակայն դա բավարար չէ, և այդ ամենը միլիարդավոր դոլարների ծախս է ԱՄՆ-ի համար։
Ավելի վաղ հաղորդվել էր, որ Սինգապուրում կայացել է Միացյալ Նահանգների նախագահ Դոնալդ Թրամփի և Հյուսիսային Կորեայի առաջնորդ Կիմ Չեն Ընի պատմական հանդիպումը։ Միացյալ Նահանգների ղեկավարն ասել է. «Հանդիպումն անցավ շատ ավելի լավ, քան որևէ մեկը կարող էր ակնկալել»:
ԱՄՆ նախագահ Դոնալդ Թրամփը և ԿԺԴՀ առաջնորդ Կիմ Չեն Ընը Սինգապուրում գագաթնաժողովի արդյունքներով փաստաթուղթ են ստորագրել: Արարողությունը կայացել է Սենտոսա կղզում գտնվող «Կապելա» հյուրանոցում: Փաստաթղթում նշվում է, որ ԱՄՆ-ն և ԿԺԴՀ-ն պատրաստ են նոր հարաբերությունների և խաղաղության:










