Թրամփը բացատրել է՝ ինչու է հարկավոր Ռուսաստանը վերադարձնել G7
Միացյալ Նահանգների նախագահ Դոնալդ Թրամփը Fox News-ին տված հարցազրույցում հայտարարել է, որ կանադական Քվեբեկում կայացած «Մեծ յոթնյակ»-ի (G7) գագաթնաժողովի քննարկումների զգալի մասը վերաբերել է Ռուսաստանին, ուստի՝ այդ երկիրն անհրաժեշտ է վերադարձնել G7-ի կազմ:
«Գիտեք՝ մենք մեր ժամանակի մոտ 25%-ը ծախսել ենք Ռուսաստանի մասին զրույցների վրա: Եվ ես ինքս իմ մեջ մտածեցի՝ արդյո՞ք ավելի լավ չէր լինի, եթե նրանք այստեղ լինեին: Ես Ռուսաստանի կողմից չեմ, ես Միացյալ Նահանգների կողմից եմ: Ահա ձեզ օրինակ բերեմ. եթե Վլադիմիր Պուտինը մյուս անդամ պետությունների ղեկավարների պես ինձ հետ նստած լիներ նույն սեղանի շուրջ, եթե նա այնտեղ լիներ, ես նրան կխնդրեի այնպիսի բաներ անել, որոնք օգուտ կբերեին և՛ աշխարհին, և՛ իրեն»,- ասել է Թրամփը՝ հավելելով, որ նախընտրում է ոչ թե հեռախոսային, այլ անձնական շփումը:
Իր խոսքում ԱՄՆ նախագահը Ռուսաստանին G8-ի կազմից հանելու ու միությունն ինքնըստինքյան G7-ի վերածելու պատասխանատվությունը դրել է նախկին ղեկավար Բարաք Օբամայի վրա:
Թրամփը հունիսի 8-ին հայտարարել է, որ Ռուսաստանի Դաշնությունը պետք է վերադառնա «Մեծ յոթնյակ»-ի (G7) կազմ: Կրեմլն արդեն արձագանքել է այս հայտարարությանը՝ նկատելով, որ Մոսկվան հիմա կարևորում է այլ ձևաչափերը:
Նշվում է նաև, որ Թրամփի դիրքորոշմանն իր աջակցությունն է հայտնել Իտալիայի նոր վարչապետ Ջուժեպե Կոնտեն՝ նկատելով, որ դա բխում է բոլորի շահերից:
Հավելենք, որ «Մեծ ութնյակ»-ը, որն իրենից ներկայացնում է տնտեսապես զարգացած պետությունների միություն, հիմնվել է 1998թ.: Սակայն 2014թ. Ղրիմի՝ Ռուսաստանի կազմում ներառվելու հետևանքով, ՌԴ-ն հեռացվել է միությունից, ինչի հետևանքով G8-ը դարձել է G7: Այժմ դրան անդամակցում են ԱՄՆ-ն, Կանադան, Մեծ Բրիտանիան, Ֆրանսիան, Գերմանիան, Իտալիան ու Ճապոնիան:










