Դերասանուհի Զոի Կրավիցը Բեթմենի մասին նոր ֆիլմում հանդես կգա Կատու կնոջ դերում

Ամերիկացի դերասանուհի Զոի Կրավիցը Ռոբերտ Պատինսոնի գլխավոր դերակատարմամբ Բեթմենի մասին նոր ֆիլմում հանդես կգա Կատու կնոջ (Սելինա Կայլ) դերում, հաղորդում է Holywood Reporter-ը:

Պարբերականի աղբյուրը հայտնել է, որ «Մեծ փոքր սուտ» (Big little lies) սերիալի աստղն անցած շաբաթ մասնակցել է քասթինգին: Ըստ հաղորդման՝ նա սցենարից մի դրվագ է կարդացել Պատինսոնի հետ:

Բացի Կրավիցից, DC Comics-ի ամենահեղինակավոր կերպարներից մեկի դերը ստանձնելու համար պայքարել են նաև այլ հայտնի դերասանուհիներ:

Նախկինում Կատու կնոջ դերը խաղացել են Ջուլի Նյումարը, Միշել Պֆայֆերը, Հոլի Բերին և Էնն Հեթուեյը:

Կրավիցի հաջողության կապակցությամբ շատ հպարտ է նաև վերջինիս խորթ հայրը՝ դերասան Ջեյսոն Մոմոան, որն Instagram-ում հայտնել է այդ ուրախալի լուրի մասին և շնորհավորել Զոիին՝ հայտնելով, որ անչափ հպարտ է նրանով:

Ֆիլմը, ըստ հաղորդման, կթողարկվի 2021 թվականի հունիսին: