73 տարեկանում մահացել է «Լոլիտա» ֆիլմի աստղ Սյու Լայոնը

73 տարեկանում մահացել է «Լոլիտա» ֆիլմի աստղ Սյու Լայոնը, գրում է Fox news-ը:

Նրա դուստրը՝ Նոնան, հայտնել է, որ դերասանուհին մահացել է նախորդ հինգշաբթի առավոտյան՝ Հյուսիսային Հոլիվուդի ծերանոցում:

«Տարիներ շարունակ նրա առողջականը դեպի վատն էր գնում, ինչը հանգեցրեց նրա մահվանը»,- հայտնել է Նոնան:

Նա հավելել է, որ մոր կորստյան ցավը ցանկանում են սգալ առանց կողմնակի մարդկանց ներկայության:

«Մենք խնդրում ենք երկրպագուներին, որոնց նա շատ էր սիրում, այս պահին հարգել մեր որոշումը»,- հավելել է նա:

1946 թվականի հուլիսի 10-ին Այովա նահանգում ծնված դերասանուհին հետագայում տեղափոխվել է Դալաս, սակայն ի վերջո հաստատվել է Լոս Անջելեսում:

Վլադիմիր Նաբոկովի հայտնի «Լոլիտա» ստեղծագործության հիման վրա Սթենլի Կուբրիկի էկրանավորման մեջ Լայոնը 14 տարեկանում ստացել է իր առաջին գլխավոր դերը:

Այդ դերի համար պայքարել է ավելի քան 800 աղջիկ:

«Լոլիտա»-ից հետո Լայոնը հանդես է եկել The Night of the Iguana, Tony Rome, Evel Knievel և այլ ֆիլմերում:

1963 թվականին «ամենահեռանկարային սկսնակ դերասանուհի» անվանակարգում նա արժանացել է «Ոսկե գլոբուսի»: