Միայն համերաշխ հասարակությունը կարող է առաջ ընթանալ, քանի կան բաժանարար գծեր, ատելություն, մենք հաջողության ակնկալիք ունենալ չենք կարող. Հովիկ Չարխչյան

Անցնող տարում  պետության ակտիվ մասնակցությունը նկատելի չէր մշակութային կյանքում, այն բոլոր դրսևորումները, որոնք նախորդ տարվա ընթացքում կային, անհատական, մասնավոր էին: Այս մասին Tert.am-ի հետ զրույցում ասաց սևակագետ Հովիկ Չարխչյանը՝ ամփոփելով 2019-ի մշակութային կյանքը:

Պետության ֆինանսավորմամբ մի քանի զվարճանք-միջոցառումներ եղան, որոնք ավելի շատ հանրային միջոցառումներ էին հիշեցնում, քան մշակութային որևէ լուրջ գործողություններ: «Չնայած դրան՝ արվեստի գրեթե բոլոր ճյուղերում որոշակի առաջընթաց կար, բավականին նոր գրքեր գրվեցին, նոր անուններ ի հայտ եկան, թարգմանական գրականության իմաստով բավականին առաջընթաց կար, հրատարակչական գործունեության մեջ շատ նշանակալի ձեռքբերումներ կային: Արձանագրվեց ընթերցողների բավականին նշանակալի աճ, և մեր հանրության հատկապես երիտասարդության հետաքրքրությունը գրականության նկատմամբ բավականին աճել է: Ես դա համարում եմ կարևոր ձեռքբերում»,-ասաց նա:

Հովիկ Չարխչյանը նշեց, որ այս պահին մշակույթը պետության առաջնահերթություններում չի տենում, հետևողական աշխատանք չի եղել: «Մենք պետք է հաշվի նստենք մեր հասարակության ներսում ձևավորված ավանդույթների, արժեհամակարգերի հետ և մեր մշակութային ոլորտում ձեռնարկվելիք քայլերը համապատասխանեցնենք այդ արժեքներին: Երբ մենք ծայրահեղ բաներ ենք անում, բնական է, որ ծայրահեղ արձագանքների պետք է արժանանանք, մասնավորապես մետրոյի կայանում տեղի ունեցած ներկայացումը, որը ներկայացվեց իբրև մշակութային գործողություն: Հասարակության արձագանքի հետ պետք է անպայման հաշվի նստել, չի կարելի անտեսել»,-ասաց նա:

Ըստ նրա՝ պետության կարևորագույն քայլերից մեկը պետք է լինի հանրության պահանջները հաշվի առնելը և իր քաղաքականությունը ըստ այդ պահանջների ձևավորելը, այդ դեպքում կոնֆլիկտները, հակասությունները քիչ կլինեն:

Ինչ վերաբերում է ատելության մթնոլորտին, ապան ըստ նրա, բոլորս էլ հասկանում ենք, որ այսպես շարունակել չի կարելի: «Կա բավականին ծայրահեղացված վերաբերմունք այլակարծության նկատմամբ, անընդունելի երևույթ ենք համարում հանրությունը սևերի և սպիտակների բաժանելու այդ տխրահռչակ կարգախոսը, և բոլորիս երազանքը մեկն է. ձևավորել հաշտ, համերաշխ, փոխադարձ հարգանքով լցված հանրություն: Միայն այդ դեպքում հասարակությունը կարող է առաջ ընթանալ, քանի կան այդպիսի բաժանարար գծեր, քանի կան ատելության, անհանուրժողականության նման դրսևորումներ, մենք որևէ հաջողության ակնկալիք ունենալ չենք կարող, պետք է հաշտեցնել հասարակության բոլոր խմբերին, պետք է ստեղծել տանելի դաշտ, պետք է վերացնել այդ անհանդուրժողականությունը: Մարդը ազատ է իր կարծիքը արտահատելիս, և  չի կարելի նրան դատափետել, տրորել միայն նրա համար, որ նա ասել է մի բան, ինչը քեզ համար անընդունելի է, այդ պարագայում ոչ մի հաջողղություն չենք ունենա»,-ասաց նա:

Հովիկ Չարխչյանը նշեց, որ նոր տարին հետաքրքիր խորհուրդ ունի, մարդիկ հանրագումարի են բերում այն ամենը, ինչ կատարվել է մեկ տարում և փորձում են հասկանալ որտեղ վրիպեցին, որտեղ հաջողեցին: «Այս իմաստով շատ լավ հնարավորություն է, որ յուրաքանչյուր մարդ առանձին խորհի իր անելիքների մասին և հասկանա, թե որն է այն ճանապարհը, որով պետք է շարունակի անցնել , և ինչն է, որ պետք է թողնի անցյալում»,-ասաց նա: