Լիամ Գալահերն ակնարկել է 2022 թվականին Oasis խմբի վերամիավորման մասին (լուսանկարներ, տեսանյութեր)

Անգլիացի երգիչ և երգերի հեղինակ, Oasis խմբի նախկին մենակատար Լիամ Գալահերն ակնարկել է 2022 թվականին աշխարհահռչակ Oasis խմբի վերամիավորման մասին, գրում է Daily Mail-ը:

47-ամյա ռոք աստղը հայտնել է, որ ինքն ու եղբայրը՝ Նոել Գալահերը, կարող են վերջ դնել իրենց տասնամյա թշնամությանը՝ պնդելով, որ Նոելն «աղերսում է իրեն» երկու տարի անց կրկին վերամիավորվել Oasis-ի շրջանակում:

Լիամը սոցիալական ցանցերում իր երկրպագուներին նաև հայտնել է, որ երրորդ ալբոմի թողարկումից հետո մտադիր է ավարտել իր սոլո կարիերան:

«3-րդ ալբոմից հետո պատրաստվում եմ դադար առնել, չեմ կարծում, որ այլևս կարող եմ միայնակ աշխատել: Ես կարող եմ գրել այն, ինչ ինձ դուր է գալիս, նա՝ նույնպես, բայց կարծում եմ, որ լավագույն տարբերակը սա է...»,- Twitter-ում գրել է Wonderwall հիթի կատարողը՝ անավարտ թողնելով միտքը:

«Ես մտադիր եմ ավարտել իմ սոլո կարիերան, քանի որ եղբորիցս զանգ ստացա. նա ինձ խնդրում էր Oasis խումբը վերամիավորել 2022 թվականին»,- հավելել է նա:

Երկրպագուներից ոմանք փոքր-ինչ կասկածամտորեն են վերաբերվել Լիամի թվիթերյան գրառմանը՝ հաշվի առնելով երկու եղբայրների միջև թշնամական հարաբերությունները, ինչի մասին հայտնի դարձավ 2009 թվականին՝ Oasis խմբի պառակտումից հետո:

Oasis անգլիական ռոք խումբը ձևավորվել է 1991 թվականին Մանչեսթեր քաղաքում։

18 տարվա գոյության ընթացքում խումբը թողարկել է 7 ստուդիական ալբոմ, որոնցից յուրաքանչյուրը գլխավորել է Մեծ Բրիտանիայի հիթ-շքերթները: Խմբի 22 սինգլ հայտնվել է Մեծ Բրիտանիայի վարկանշային աղյուսակների լավագույն տասնյակում, իսկ դրանցից 8-ը գտնվել են առաջին հորիզոնականում։

Խումբն իր գործունեությունը դադարեցրել է 2009 թվականին, երբ Նոել Գալահերը հայտարարել է, որ լքում է խումբը՝ եղբոր հետ աշխատելու անհնարինության պատճառով: