Այդ խելագարության կանխավարկածը, թե ԱՆ-ն տվել է այնպիսի ցուցումներ, որոնք կվնասեն մեր սերունդներին, չեմ կարողանում հասկանալ․ Արայիկ Հարությունյանը՝ դպրոցում պարտադիր դիմակ կրելու մասին

12:28 • 16.09.20

 

Դպրոցներում աշակերտների դիմակների կրման առումով մենք հետևում ենք նախկինում պարետատան, իսկ  հիմա՝ առողջապահության նախարարության կողմից սահմանված ցուցումներին։ Այս մասին հրավիրված ասուլիսին ասաց ԿԳՄՍ նախարար Արայիկ Հարությունյանը:

«Մենք այս շաբաթվա ընթացքում իրավիճակին կհետևենք. ասել ենք, որ ուղեցույցը հընթացս կարող է փոփոխությունների ենթարկվել: Այս պահին դիմակների կրելու առումով լուրջ բողոքներ չենք ստացել, դպրոցներում լարվածություն չենք տեսնում: Դիտարկումներ ուսուցիչներից չենք ստացել»,- ասաց նախարարը:

Նրա խոսքով՝ հիմնականում բողոքներն այն են, թե երեխաների մոտ կարող են առողջական խնդիրներ առաջանալ: «Մենք ուղիղ աշխատում ենք միջազգային առողջապահական կազմակերպության հետ, առողջապահության նախարարության հետ՝ այս գործընթացում մեր երեխաների և մեր աշակերտների գործոնը շահարկելու հետ կապված: Այդ երեխաները, 1-11-րդ դասարանների աշակերտները, մեր, մեր հարազատների, իմ գործընկերների, նախարարության աշխատակիցների ընտանիքներում մեծացող երեխաներ են և ես չգիտեմ՝ ինչ խելագարության կանխավարկածով մենք պետք է առաջնորդվենք՝ մտածելու, որ նախարարությունը ընդունել է մի այնպիսի կանոնակարգ, կամ առողջապահության նախարարությունը մեզ տվել է այնպիսի ցուցումներ, որոնք ազդելու են մեր սերունդների առողջության վրա, ես այս խելագարության կանխավարկածը չեմ կարողանում հասկանալ»,- նշեց նա:

Նախարարն ընդգծեց. «Մենք պետք է վերանանք այդ խելագրության կանխավարկածից, որ ընդունվում են որոշումներ, որոնք միտված մեր երեխաների առողջությանը վնասելուն։ Սա լուրջ չէ և լրատվամիջոցների, ԱԺ-ի որոշ գործընկերների կողմից սա տիրաժավորելը նույնպես լուրջ չէ: Մեր երեխաներին մի՛ դարձրեք ձեր քաղաքական օրակարգերի հարց, որովհետև դա վտանգավոր տեղ է տանում»:

Նախարարը հավելեց, որ սեպտեմբերի 10-ի դրութամբ ունեն ուսուցիչներից 6000-ի թեստավորման արդյունք, որը ցույց է տալիս, որ վարակվածների թիվը մեկ տոկոսի սահմանում է, ինչը, ըստ նրա՝ շատ լավ արդյունք է: