Մինչև 2050 թ. ՀՀ բնակչությունը հասցնել առնվազն 5 միլիոնի, յոթնապատկել միջին աշխատավարձը․ վարչապետը ներկայացրեց վերափոխման ռազմավարությունը (տեսանյութ)
ՀՀ վարչապետ Նիկոլ Փաշինյանը ներկայացնում է Հայաստանի վերափոխման՝ մինչև 2050 թվականի ռազմավարությունը՝ նշելով, թե մինչ այս նախորդ 30 տարվա ռազմավարություն չի եղել, ինչը գուցե նաև պայմանավորում է այսօրվա բազմաթիվ խնդիրները:
Հայաստանի վերափոխման 30 տարվա ռազմավարությունը շատ կարևոր է՝ հասկանալու համար՝ ուր ենք գնում, ինչ ենք ուզում և ինչպիսին ենք պատկերացնում ՀՀ-ն 2050-ին: Այս պահից սկսած՝ Կառավարության ցանկացած որոշում պետք է միտված լինի այս գաղափարի, տեսլականի իրագործմանը: Սա տեսլականի վրա հիմնված հավակնություն է, ոչ թե կանխատեսելի պարտավորություն և պլան: Մենք ձևակերպում և բարձրաձայնում ենք մեր հավակնությունը, որը եթե մի քիչ ավելի ոչ պաշտոնական ձևով ասելու լինենք, գուցե կարելի է ձևակերպել նաև որպես երազանք»,-ասաց նա՝ նշելով, թե սրանք ոչ միայն ենթադրում են կանոնակարգերի, օրենքների փոփոխություն, այլև խորքային առումով փոփոխություն հանրության շրջանում:
Այսպիսով, վարչապետի խոսքով, ռազմավարությունը, որն ունի գաղափար, տեսլական, գործողություն, նշանակությունը պետք է լինի գործնական. «Ռազմավարության տեսանկյունից մենք առանձնացնում ենք 4 առաջնորդող արժեքներ, որոնք պետք է գործառնական և գործնական նշանակություն ունենան այդ ռազմավարությունը ներկայացնելիս»,-ասաց նա՝ նշելով այդ 4 արժեքները՝
· Հայոց պետականություն
· Կրթություն
· Անհատ
· Աշխատանք։
Նրա խոսքով՝ գաղափարական հենքը, որ դրված է ռազմավարության հիմքում, ազգային նպատակներն են. դրանք են՝
· Հայկական պետականության հավիտենականության համար անհրաժեշտ գաղափարական, անվտանգային, հանրային, քաղաքական, իրավական, տնտեսական, ժողովրդագրական, միջազգային, կրթական, ինտելեկտուալ, մշակութային, ինստիտուցիոնալ պայմանների ապահովում
· ՀՀ քաղաքացիության և քաղաքացու արժևորում՝ նրանց անվտանգության, ազատության, բարեկեցության և երջանկության ապահովման և պաշտպանության համար
· Հայ ժողովրդի ազգային-պետական ինքնության, ինքնուրույնության և ինքնիշխանության պահպանումը և զարգացումը, ներառյալ՝ ազգային ինքնության վերականգնումը և զարգացումը ազգային ինքնագիտակցությունից հեռացած և հեռացող հայության շրջանում՝ հայոց լեզվի իմացության մակարդակի և ՀՀ քաղաքացիություն ունեցողների թվի էական մեծացման շնորհիվ,
· Համահայկական ներուժի համախմբում՝ ազգային նպատակների իրագործման շուրջ՝ հանուն ազգային արժեքների պահպանման և զարգացման, օրենքի և իրավունքի վրա հիմնված ազգային համերաշխության հաստատում:





Փաշինյանի խոսքով՝ ռազմավարական կարևորագույն գաղափարը Հայաստանի հանդեպ միլիոնավոր անհատների վերաբերմունքը փոխելն է: Ռազմավարությունը, ըստ Փաշինյանի, պետք է կառուցվի այնպես, որ Հայաստանը լինի ոչ միայն ապրելու, այլև աշխատելու ամենագերադասելի վայրն աշխարհում:
Հաջորդ ռազմավարական խնդիրը վերափոխելն է հարյուր միլիոնավոր օտարերկրացիների և նրանց առաջնորդների վերաբերմունքը ՀՀ-ի հանդեպ: «Ամեն տարվա, տասնամյակի հետ ՀՀ-ն պետք է ավելի գրավիչ դառնա որպես ներդրումային վայր, որպես իրավահավասար գործընկեր միջազգային հարաբերությունների համատեքստում, և որպես զբոսաշրջության ցանկալի վայր»,-նշեց նա:
Ներկայացնելով տեսլականը՝ ՀՀ վարչապետը նշեց, թե ինչպիսի ցուցանիշներ են ակնկալվում 2050-ին, որոնք մի կողմից կլինեն ռազմավարության արդյունք, մյուս կողմից՝ ռազմավարության իրագործման շատ կարևոր ցուցանիշ:
Այսպիսով, մինչև 2050 թ.-ը՝
· ՀՀ բնակչությունը հասցնել առնվազն 5 միլիոնի,
· ստեղծել 1500 նոր աշխատատեղ,
· հաղթահարել աղքատությունն աշխատանքով,
· 20-ապատկել ՀՀ համախառն ներքին արդյունքը,
· 7-նապատկել միջին աշխատավարձը,
· առողջ ապրելակերպը դարձնել ազգային հատկանիշ, կյանքի սպասվող տևողությունը հասցնել 90 տարվա,
· մեկ շնչի հաշվով ունենալ աշխարհի ամենամարտունակ բանակը,
· ունենալ աշխարհի 10 ամենաարդյունավետ հետախուզական ծառայություններից մեկը,
· սովորելը դարձնել ազգային ապրելակեպ,
· բուհերի միջազգային վարկանիշի առաջին երկուհարյուրակում ունենալ առնվազն 3 բուհ,
· ՀՀ-ն դարձնել բարձր տեխնոլոգիական արդյունաբերական երկիր,
· ունենալ մինչև 10 մլրդ և ավելի արժեքով առնվազն 5 տեխնոլոգիական ընկերություն և առնվազն 10 000 աշխատող ստարտափ,
· ունենալ առողջ շրջակա միջավայրով, կլիմայադիմակայուն և էներգաարդյունավետ ՀՀ,
· կրկնապատկել ՀՀ անտառածածկ տարածքները,
· նվաճել 25 օլիմպիական ոսկե մեդալ,
· ֆուտբոլի ազգային հավաքականը դարձնել Եվրոպայի և կամ աշխարհի առաջնության մեդալակիր,
· նվաճել շախմատի աշխարհի անհատական չեմպիոնի կոչում,
· ՀՀ այցելող զբոսաշրջիկների թիվը հասցնել տարեկան 15 մլն-ի։
Վարչապետն ընդգծեց, թե այս ռազմավարության իրականացման համար ձևակերպել են 16 մեգանպատակ.
1. Կիրթ և կարողունակ քաղաքացի, ժողովուրդ
2. Պաշտպանված ՀՀ
3. Արդյունավետ և հաշվետու կառավարում
4. Առողջ և ապահով քաղաքացի, ժողովուրդ
5. Իրավական ՀՀ
6. Բազմազավակ և բարեկեցիկ ընտանիք
7. Մշակված արտադրանքի զանգվածային արտահանում
8. Մաքուր և կանաչ ՀՀ
9. Տարածքային խելամիտ զարգացում
10. Արտադրողական և պատասխանատու ֆերմերություն
11. Մեծ հայրենադարձություն և ինտեգրում
12. Աշխարհի հետ կախված Հայաստան
13. Վերականգնվող և հանրամատչելի էներգիա
14. Գործարարների համար գրավիչ ՀՀ
15. Գիտելիքահենք ՀՀ
16. Ճանաչված, հարգված, հյուրընկալ ՀՀ։










