«Բոլորիդ մաղթում եմ ուժ, եռանդ, սեր և համերաշխություն». Արմեն Փամբուխչյանը, որպես ԱԺ պատգամավոր, ելույթ ունեցավ վերջին անգամ (տեսանյութ)
Այսօր Ազգային ժողովի արտահերթ նիստին «իմ քայլը» խմբակցությունից Արմեն Փամբուխչյանը հիշեցրեց, որ մանդատը վայր դնելու դիմում է ներկայացրել և օգտվեց Ազգային ժողովում որպես պատգամավոր ելույթ ունենալու իր վերջին հնարավորությունից ՝ շնորհակալություն հայտնելով համագործակցության համար:
Նա շնորհակալություն հայտնեց բոլոր պատգամավորներին՝ արդյունավետ աշխատանքի համար, հատկապես այն պատգամավորներին, որոնք անկախ իրենց քաղաքական հայացքներից և ֆրակցիայից կարողացան կառուցել մարդկային ջերմ և լավ հարաբերություններ: Նա առանձնահատուկ շնորհակալություն հայտնեց «Իմ քայլը» խմբակցությանը:
«Ես բոլորիդ մաղթում եմ ուժ, եռանդ, սեր և համերաշխություն»,-ասաց նա և դահլիճից հնչեցին ծափեր:
ԱԺ նախագահ Արարատ Միրզոյանը նշեց, որ խորհրդարանն իր ծափողջյուններով արդեն վերաբերմունք դրսևորեց: «Ակնհայտորեն դա ցուցիչ էր այն բանի, որ բոլորիս համար էլ հաճելի էր համատեղ աշխատանքը, Ձեզ հաջողություններ ենք մաղթում»,-ասաց նա:
Նշենք՝ սեպտեմբերի 17-ին Արմեն Փամբուխչյանը դիմում էր ներկայացրել ԱԺ նախագահին՝ մանդատը վայր դնելու վերաբերյալ:










