«Ինչու օրենքով ընտրված մեր ռեկտորը մինչև օրս դեռ նշանակված չէ այդ պաշտոնում». ՀՊՏՀ դասախոսներն ու ուսանողները բողոքի ակցիա արեցին Կառավարության դիմաց (տեսանյութ)

11:11 • 22.09.20

Կառավարության դիմաց բողոքի ակցիա արեցին Հայաստանի պետական տնտեսագիտական համալսարանի ուսանողներն որ դասախոսները։ Նրանք ցանկանում են իմանալ, թե ինչու օրենքով ընտրված ռեկտորը մինչև օրս դեռ նշանակված չէ այդ պաշտոնում։

Արդեն շուրջ 2 տարի է՝ Հայաստանի պետական տնտեսագիտական  համալսարանը ղեկավարվում է ռեկտորի պաշտոնակատարների կողմից։ 2020 թվականի մայիսին ՀՀ ԿԳՄՍ նախարարությունը վերջապես հայտարարեց «ՀՊՏՀ» ՊՈԱԿ-ի ռեկտորի թափուր պաշտոնի մրցույթ:

Հուլիսի 17-ին կայացած մրցույթում «ՀՊՏՀ» ՊՈԱԿ խորհրդի անդամների ձայների 2/3-ով ՀՊՏՀ ռեկտորի պաշտոնում ընտրվեց Դիանա Գալոյանը: «Բարձրագույն և հետբուհական մասնագիտական կրթության մասին» ՀՀ օրենքի 15-րդ հոդվածի 4-րդ կետի համաձայն՝ ՀՀ Կառավարությունը հաստատում է ռեկտորի ընտրության արդյունքները, ինչը ընտրությունից ավելի քանի երկու ամիս անց դեռևս չի իրականացվել։ Այս իրավիճակը ավելի է խորացնում անորոշությունը, որը ստեղծվել է ՀՊՏՀ շուրջ՝ հանդիսանալով ճգնաժամի պատճառ:

ՀՊՏՀ ուսումնական աշխատանքների գծով պրոռեկտոր և այս պահին ռեկտորի պարտականություննը կատարող Արմեն Գրիգորյանը լրագրողների հետ զրույցում ասաց, որ իրենց հարցի լուծումը չեն ստացել, համալսարան են գնալու և սպասելու են Կառավարության կողմից խնդրի լուծմանն ու պատասխանին, թե ինչու օրենքով ընտրված ռեկտոր Դիանա Գալոյանն այսօր ռեկտոր չէ:

«Մենք պետք է օրենքով շարժվենք, ոչ թե ինչ-որ պատգամավոր վեր կենա ու իր ուզածը խոսի, լավ է՝ գոնե վերջին մի քանի տարվա ընթացքում սովորել են և ասում են՝ սա իմ սուբյեկտիվ կարծիքն է, որովհետև նախկինում տվյալ տիկինն իր կարծիքը ներկայացնում էր որպես դառը իրականություն»,- ասաց նա:

Ըստ նրա՝ այս հավաքը ԿԳՄՍ նախարար Արայիկ Հարությունյանի դեմ չէ, և այդ պնդումը միայն հիվանդ երևակայության արդյունք է: Նա շեշտեց, որ ՀՊՏՀ-ն ավելի կազմակերպված է աշխատում, քան յուրաքանչյուրը կարող է պատկերացնել, և սա է հենց  խնդիրը, որ այդ կազմակերպվածության ֆոնին նրանք ռեկտոր չունեն:

Այս հարցով ՀՊՏՀ գիտական խորհուրդը դիմել է և՛ ԿԳՄՍ նախարարին, և՛ ՀՀ Կառավարությանը, սակայն որևէ  պատասխան այդպես էլ չի ստացել: 

Մանրամասները՝ տեսանյութում։