Երեկ Արցախում զոհված Հովիկ Խաչատրյանի հայրն էլ զոհվել էր Շուշիի ազատագրման օրը, Հովիկն էլ սպասում էր առաջնեկին. համայնքապետ

14:31 • 29.09.20

1990 թվականին ծնված Հովիկ Խաչատրյանը զոհված ազատամարտիկի որդի էր, հայրն էլ իր տարիքում Ոսկեպարի մարտերին է զոհվել՝ Շուշիի ազատագրման օրը: Այս մասին Tert.am-ի հետ զրույցում հայտնեց Արագածոտնի մարզի Սասունիկ համայնքի ղեկավար Արման Մարգարյանը՝ պատմելով հակառակորդի դեմ ծավալված մարտերի ընթացքում նահատակված զինծառայող Հովիկ Խաչատրյանի մասին:

Համայնքապետը նշեց, որ զոհվածի մայրը մանկավարժ է: «Հովիկը նոր էր ամուսնացել,  շուտով առաջնեկը կծնվի»,-ասաց նա:

Հիշեցնենք, որ Ադրբեջանը հարձակում է սկսել Արցախի ուղղությամբ, թե՛ զինվորականների, թե՛ բնակչության շրջանում կան զոհեր, Արցախում և ՀՀ-ում ռազմական դրություն և զորահավաք է հայտարարվել։ Սեպտեմբերի 27-ին հակառակորդի դեմ ծավալված մարտերի ընթացքում նահատակվել են ևս 15 զինծառայողներ։