Փաշինյանը հայտարարել է, որ Պուտինի հետ չի քննարկել 102-րդ ռազմաբազայի ներուժի կիրառման հարցը

10:56 • 30.09.20

ՀՀ վարչապետ Նիկոլ Փաշինյանը և ՌԴ նախագահ Վլադիմիր Պուտինը երեքշաբթի տեղի ունեցած հեռախոսազրույցի ընթացքում չեն քննարկել Ռուսաստանի Դաշնության հնարավոր ռազմական միջամտությունը արցախյան հակամարտությանը: 

Ինչպես նշում է ՏԱՍՍ գործակալությունը, այս մասին ռուսական լրատվամիջոցների հետ զրույցում ասել է ՀՀ վարչապետը:

«Մենք ՌԴ նախագահի հետ չենք քննարկել արցախյան հակամարտությունում Ռուսաստանի հնարավոր ռազմական միջամտությունը: Նաև, դեռևս կարիք չունենք օգտագործել 102-րդ ռուսական ռազմաբազայի ներուժը, բայց նման անհրաժեշտության դեպքում կան բոլոր իրավական հիմքերը»,-նշել է Փաշինյանը:

Վարչապետը հայտարարել է նաև, որ Հայաստանը ցանկանում է որակապես նոր հարաբերություններ ստեղծել Ռուսաստանի հետ:

«Հայաստանի և Ռուսաստանի հարաբերություններում ոչինչ չի պատահել և չկան նրբերանգներ, որոնք նախկինում չեն եղել: Ռուսաստանի հետ հարաբերություններում մեր նպատակը նոր մակարդակի և որակի հարաբերությունների կառուցումն է»,-նշել է Փաշինյանը:

Հիշեցնենք, որ սեպտեմբերի 27-ին՝ ժամը 07:15-ի սահմաններում, հակառակորդը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական հակամարտ զորքերի շփման գծի ողջ երկայնքով՝ թիրախավորելով նաև խորը թիկունքում տեղակայված բնակավայրերը, այդ թվում՝ մայրաքաղաք Ստեփանակերտը:

Լույս սեպտեմբերի 28-ին մարտական գործողությունները շարունակվել են, մեր ԶՈւ-երը ունեցել են նշանակալի հաջողություններ: Այս մասին ֆեյսբուքյան իր էջում գրել է ռազմական փարձագետ Արծրուն Հովհաննիսյանը։

«Սակայն դեռ հանգիստ չէ, մարտերը շարունակվում են, որոշ տեղերում հրետանային մենամարտեր են: Մեր զորքերի մասին ադրբեջանական կողմի հայտնած կորուստները չեն համապատասխանում իրականությանը»,- գրել է նա։

Հիշեցնենք, որ Ադրբեջանը հարձակում է սկսել Արցախի ուղղությամբ, թե՛ զինվորականների, թե՛ բնակչության շրջանում կան զոհեր, Արցախում և ՀՀ-ում ռազմական դրություն և զորահավաք է հայտարարվել։

Այս պահին պաշտոնական տվյալներով հակառակորդի դեմ ծավալված մարտերի ընթացքում զոհվել է 81 զինծառայող։ Երեկ և այսօր հրապարակվել են նրանց անունները։