Այսօր հակառակորդն ունեցել է 540 սպանված, ավելի քան 700 վիրավոր, 45 միավոր զրահատեխնիկայի, 6 ինքնաթիռի, 3 ուղղաթիռի և 6 ԱԹՍ-ի կորուստ. Ա. Հովհաննիսյան (տեսանյութ)
Մարտերը շարունակվում են, ծանրության կետերը մնում են նույն ուղղությունները, հակառակորդը որոշ մարտավարություններ փոփոխելով՝ փորձում է հարձակողական գործողություններ իրականացնել, սակայն մեր զինված ուժերը հետ են մղում բոլոր գրոհները, փոքր, թե մեծ՝ հակառակորդին պատճառելով ծանր կորուստներ: Այս մասին այսօր Հայկական տեղեկատվական կենտրոնի ասուլիսում ասաց ՊՆ ներկայացուցիչ Արծրուն Հովհաննիսյանը՝ ներկայացնելով ներկա պահին սահմանում տիրող իրավիճակը:
Արծրուն Հովհաննիսյանի ներկայացմամբ՝ այս պահի դրությամբ հակառակորդի կորսուստներն են․ 540 սպանված, ավելի քանի 700 վիրավոր, բոլոր տեսակնեը միասին մոտ 45 միավոր զրահատեխնիկա, 6 ինքնաթիռ, 3 ուղղաթիռ, 6 ԱԹՍ։
«Ցավոք, հակառակորդն արդեն 2-3 օր ընտրել է խաղաղ բնակչությանը թիրախավորելու մարտավարությունը և թիրախավորում է խոշոր տրամաչափով զենքերից, որի արդյունքում երեկ լրագրողներ են տուժել: Այսօր երկու անգամ հեռահար հրթիռային միջոցներով հրետանակոծել են Հադրութ քաղաքը, երկու անգամ՝ Ստեփանակերտ քաղաքը, որից տուժել են մեծ թվով խաղաղ բնակիչներ, շինություններ»,- ասաց նա և հավելեց, որ թիրախավորվում են ենթակառուցվածքները և այս պահին իրավիճակը շարունակում է լարված մնալ:
Նա նշեց, որ մարտերի բուն կենտրոնները կրկին հյուսիսն ու հարավն են և մեր ԶՈՒ-ն հիմնականում պաշտպանողական, բայց որոշ տեղերում նաև այլ բնույթի մարտական գործողություններ են իրականացնում: Այն հարցին, թե հակառակորդի կիրառած ուժին մեր կողմից համարժեք պատասխան է լինո՞ւմ, վերջինս պատասխանեց, որ դա որոշում են զինվորականները, որովհետև նրանք են պահը ճիշտ գնահատում և նրանց պրոֆեսիոնալիզմին կասկածել պետք չէ:
Հովհաննիսյանը ներկայացրեց, որ հայ-ադրբեջանական սահմանը համեմատած ավելի հանգիստ է՝ չհաշված երեկվա և այսօր առավոտվա առանձին դեպքերը, որովհետև դրանցից հետո այլ միջադեպեր, մարտական գործողություններ չեն եղել:
ԱԻՆ-ի ներկայացուցիչ Էդան Սնգրյանն ասուլիսի ժամանակ ներկայացրեց քաղպաշտպանության ազդանշանները և դրանցով պայմանավորված վարվելակերպի կանոնները մարտական դրության ընթացքում․ «Եթե գտնվում եք տանը, անհրաժեշտ է հնարավորինս կարճ ժամանակահատվածում վերցնել առաջին անհրաժեշտության իրեր, սնունդ, ջուր, փաստաթղթեր։ Օգնե՛ք ձեր զավակներին, ծերերին և ուղղվե՛ք մերձակա պաշտպանական կառույցներ։
Եթե դրսում եք, գնահատե՛ք իրավիճակը, առանց խուճապի մատնվելու գտե՛ք և ուղղվե՛ք մերձակա պաշտպանական կառույցներ»։











