Տարոնը արվեստի հանդեպ մեծ սեր ուներ, սիրում էր նկարել և քանդակագործությամբ զբաղվել, ուզում էր մեծ նկարիչ դառնալ. ուսուցչուհին՝զոհված զինծառայողի մասին
Հակառակորդի սանձազերծած ռազմական գործողությունների ընթացքում զոհված, 2000 թ. ծնված Տարոն Հրայրի Ֆիլիպոսյանը տան փոքր երեխան էր, իրենից մեծ եղբայր ու քույր ուներ:
Tert.am-ի հետ զրույյցում Սիսիանի ավագ դպրոցի փոխտնօրեն Հասմիկ Վարդանյանը նշում է, որ Տարոնը սովորում էր Գեղարվեստի պետական ակադեմիայում, իր նկարներն արտասահմանյան տարբեր քոլեջներ էր ուղարկել, արտերկրում քոլեջ էր ընդունվել, պետք է ծառայությունից հետո ուսումը շարունակեր:
Պատմություն առարկայի ուսուցչուհի Ռուզան Խաչատրյանն էլ իր հերթին նշում է, որ Տարոնը չափազանց պարտաճանաչ ու կարգապահ մարդ էր, արվեստի հանդեպ մեծ սեր ուներ, սիրում էր նկարել և քանդակագործությամբ զբաղվել, ուզում էր մեծ նկարիչ դառնալ:
«Սիսիանի նկարչական դպրոցում էր սովորում, մենք ուրախանում էինք իր հաջողություններով, ինքն էլ հպարտանում էր, որ մենք իր գործերով հիանում էինք: 12-րդ դասարանում աշակերտներով գնացել էինք Տարոնի քանդակները տեսնելու: Արվեստի մարդ էր, նպատակ ուներ իր գործերը հայտնի դարձնել: Արտերկիր ճամբար գնալու հնարավորություն էր ձեռք բերել, բավականին լավ տիրապետում էր անգլերեն լեզվին: Շատ գնահատում էր ազգային արժեքները, ընկերասեր էր, ամեն ինչով միշտ պատրաստ էր օգնել»,- պատմեց Ռուզան Խաչատրյանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Արցախի զինուժը խոցել է հակառակորդի 11 ուղղաթիռ, 6 ինքնաթիռ (4-ը Սու–25), 103 անօդաչու թռչող սարք, 184 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 1280 զոհ, որից 180–ը Քարվաճառի ուղղությամբ, ավելի քան 2700 վիրավոր։ Հայկական կողմից, նախնական տվյալներով, կա 158 զոհ և 200-ից ավելի վիրավոր։
Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։










