Վրաստանն արգելել է իր տարածքով ռազմական նշանակության բեռների տեղափոխումը դեպի Հայաստան և Ադրբեջան

13:15 • 03.10.20

Վրաստանն արգելել է իր տարածքով ռազմական նշանակության բեռների տեղափոխումը դեպի Հայաստան և Ադրբեջան, ինչի մասին հայտնի է դարձել Անվտանգության խորհրդի նիստի ժամանակ:

ԱԱԽ քարտուղար Վախթանգ Գոմելաուրին նշել է, որ ԼՂ-ում ռազմական գործողությունների վերսկսման ֆոնին Վրաստանի կառավարությունը որոշել է արգելք սահմանել ռազմական նշանակության բեռների՝ դեպի Հայաստան և Ադրբեջան տեղափոխման համար անհրաժեշտ թույլտվության դրամադրման համար:

«Հայաստանի և Ադրբեջանի միջև ռազմական գործողությունների պատճառով Վրաստանի կառավարությունը ժամանակավորպես դադարեցրել է իր տարածքով ցամաքային և օդային ուղիներով ռազմական նշանակության բեռների տեղափոխման թույլտվության տրամադրումը: Կողմերն այդ մասին արդեն տեղեկացվել են»,-ճեպազրույցի ժամանակ ասել է քարտուղարը:

Միևնույն ժամանակ նա ընդգծել է, նա որոշումը չի վերաբերում քաղացիական բեռնափոխադրումներին:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Երեկվա դրությամբ Արցախի զինուժը խոցել է հակառակորդի 17 ուղղաթիռ, 20 ինքնաթիռ (4-ը Սու–25), 113 անօդաչու թռչող սարք, 250 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ: Հակառակորդն ունի ավելի քան 3000 զոհ, հազարավոր վիրավորներ։

Հայկական կողմից, նախնական տվյալներով, կա 158 զոհ և 200-ից ավելի վիրավոր։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։ Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն: