Քաղաքացիական բեռներն Ադրբեջան և Հայաստան ուղարկվում են առանց ընդհատումների. Վրաստանի էկոնոմիկայի նախարար

22:19 • 03.10.20

Վրաստանից քաղաքացիական բեռների տեղափոխումը Հայաստան և Ադրբեջան իրականացվում է անարգել: Ինչպես հայտնում է Новости-Грузия-ն, այս մասին հայտարարել է Վրաստանի էկոնոմիկայի և կայուն զարգացման նախարար Նատիա Տուրնավան անվտանգության խորհրդի՝ Արցախում տիրող իրավիճակին նվիրված նիստի ավարտին:

«Հակամարտության վերսկսման պահից ի վեր քաղաքացիական բեռով մեքեաների՝ սահմանը հատելու վիճակագրությունը չի փոխվել: Ամեն օր վրաց-ադրբեջանական և վրաց-հայկական սահմանը հատում է 750-800 ավտոմեքենա»,- ասել է Տուրնավան:

Վրաց նախարարը նաև ընդգծել է, որ Հայաստան բեռների առավել անվտանգ տեղափոխման համար գործարկվել է Նինոծմինդա-Բավրա անցակետը:

Այսօր ավելի վաղ հայտնի էր դարձել, որ Վրաստանի կառավարությունն արգելել է ռազմական բեռների տեղափոխումը Հայաստան և Ադրբեջան ինչպես ցամաքային, այնպես էլ օդային ճանապարհով:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։