ՄԻԵԴ-ը հարցում է ստացել Հայաստանից՝ ԼՂ հակամարտության հետ կապված Թուրքիայի դեմ քայլեր ձեռնարկելու պահանջով
Մարդու իրավունքների եվրոպական դատարանը (ՄԻԵԴ) Հայաստանից հարցում է ստացել Լեռնային Ղարաբաղի հակամարտության սրման ֆոնին Անկարայի կողմից Բաքվին ռազմական օգնության տրամադրման հարցով Թուրքիայի դեմ քայլեր ձեռնարկելու վերաբերյալ, գրում է ՏԱՍՍ գործակալությունը՝ հղում տալով դատարանի մամուլի ծառայության հայտարարությանը։
«Այո, մենք Հայաստանից Թուրքիայի դեմ միջոցների ձեռնարկման մասին հարցում ստացել ենք: Գործող կանոնների համաձայն՝ այդ հարցման բովանդակության վերաբերյալ որևէ բան ձեզ հայտնելու իրավունք չունեմ»,- նշել է ՄԻԵԴ մամուլի ծառայության ներկայացուցիչը: Նա նաև չի մանրամասնել, թե կոնկրետ երբ է քննարկվելու հարցումը: Ըստ դատական փորձի՝ նման գործընթացների համար սովորաբար մի քանի օր է հատկացվում:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։ Ադրբեջանի զինված ուժերը թիրախավորել է նաև
Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 14 մարդ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։










