«Ֆրանսիան մոբիլիզացնում է ջանքերը ԼՂ-ում հրադադարի ռեժիմի հասնելու և բանակցությունների վերսկսման համար». Ֆրանսիայի ԱԳ նախարար
Ֆրանսիայի արտգործնախարար Ժան Իվ Լը Դրիանը, ամփոփելով Ռուսաստանի, Հայաստանի, և Ադրբեջանի գործընկերների հետ ունեցած հեռախոսազրույցները, հայտարարել է, որ Ֆրանսիան պատրաստ է նպաստել Լեռնային Ղարաբաղում հրադադարի ռեժիմի հաստատմանը, գրում է ՏԱՍՍ գործակալությունը:
«Ֆրանսիան մոբիլիզացնում է ջանքերը Լեռնային Ղարաբաղում հրադադարի ռեժիմի հասնելու և բանակցությունների վերսկսման համար»,- թվիթերյան էջում գրել է նախարարը և հավելել, որ ՌԴ արտգործնախարար Լավրովի հետ զրույցի ընթացքում «անհապաղ քայլերի ձեռնարկման մասին համաձայնություն է ձեռք բերվել, և դա արվել է երկու երկրների՝ Մինսկի խմբի համանախագահության շրջանակներում»:
Նախարարը հավելել է, որ ՀՀ և Ադրբեջանի հետ արտգործնախարարների հետ բանակցություններում նա հանդես է եկել նմանատիպ դիրքորոշմամբ:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։ Ադրբեջանի զինված ուժերը թիրախավորել է նաև
Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 14 մարդ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։










