Հենրիխ Մխիթարյանը ինստագրամյան իր էջում կոչ է արել միանալ «Մենք ենք, մեր սահմանները. բոլորս Արցախի համար» դրամահավաք-արշավին
Աշխարհահռչակ հայ ֆուտբոլիստ, իտալական «Ռոմա»-ի կիսապաշտպան Հենրիխ Մխիթարյանը միացել է «Հայաստան համահայկական հիմնադրամի» կազմակերպած «Մենք ենք, մեր սահմանները. բոլորս Արցախի համար» դրամահավաք-արշավին, որի շրջանակում արդեն իսկ հանգանակվել է ավելի քան 70 միլիոն դոլար:
Մխիթարյանը դրամահավաքին միանալու կոչ է արել ինտագրամի իր պաշտոնական էջում՝ գրելով. «Աջակցե՛ք Արցախի հայությանը: Միացե՛ք հանգանակությանը»:
Հենրիխ Մխիթարյանը «Ինստագրամ»-ում ունի ավելի քան 2.6 միլիոն հետևորդ:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 6-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 251 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։










