«Հարվածը 100 տոկոսով դիտավորյալ էր». Շուշիի Սուրբ Ղազանչեցոց եկեղեցում վիրավորված ռուս լրագրողը գիտակցության է եկել և մանրամասներ պատմել
Ադրբեջանի կողմից Շուշիի Սուրբ Ղազանչեցոց եկեղեցու հրետակոծման հետևանքով վիրավորված ռուս ռազմական լրագրող Յուրի Կոտենոկը մի քանի վիրահատական միջամտությունից հետո ուշքի է եկել, սակայն բժիշկները նրա վիճակը շարունակում են ծանր գնահատել, գրում է kp.ru կայքը:
Աղբյուրը մանրամասնում է, որ լրագրողի թելեգրամյան ալիքում հրապարակվել է նրա անունից առաջին հաղորդագրությունը, որում ասվում է, որ ադրբեջանական կողմը դիտավորյալ է հարվածել եկեղեցուն:
«Հարվածը 100 տոկոսով դիտավորյալ էր: Մինչև մեր տեղ հասնելը տաճարի վրայով մոտ 20 րոպե անօդաչու թռչող սարք էր պտտվում, մեր՝ ներս մտնելուց անմիջապես հետո հարվածեցին»,- նշել է ռազմական դիտորդը:
Նշվում է, որ նա այժմ Երևանի հիվանդանոցներից մեկում է գտնվում. լրագրողին առայժմ անհնար է հայրենիք վերադարձնել: Հայտնի է, որ նա այժմ դուրս է եկել կոմայից, արդեն կարողանում է խոսել, անջատել են նաև թոքրի արհեստական համակարգը, սակայն բժիշկները շարունակում են նրա վիճակը կայուն ծանր գնահատել:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 10-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 162 անօդաչու թռչող սարք, 508 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4369 զոհ։ Հայկական կողմից, նախնական տվյալներով, կա 415 զոհ։
Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից մարդասիրական նպատակներով հայտարարվել է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար`Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։










