Ի՞նչ պետք է շնչենք, դրա համար էլ այսքան քաղցկեղ կա. երևանցիները՝ հատվող հաստաբուն ծառերի մասին (տեսանյութ)

16:39 • 26.03.25

Օդի բարձր ցուցանիշ ունեցող Երևանում թեղիները կլանում են փոշին ու ֆիլտրում օդը,  իսկ դա նշանակում է, որ արդեն շենքերի ճակատային մասերը տաքանալու են, իսկ ներսում բնակիչների ջերմային սթրեսն ավելի է շատանալու, որի հետևանքով կլինի արյան մակարդելիության բարձրացում: Այս մասին Tert.am-ի հետ զրույցում ասաց Երևանի ավագանու «Ազգային առաջընթաց» խմբակցության անդամ Քրիստինա Վարդանյանը՝ անդրադառնալով Թումանյան փողոցում տեղի ունեցած զանգվածային ծառահատումներին:

«Անցած  տարվանից  Երևանի տարբեր փողոցներում թեղիները կտրում,  փոխարենը տնկում են Նիդեռլանդներից ներմուծված սոսիներ կամ հուդայածառեր: Կտրում են առողջ ու պիտանի ծառեր, այնինչ քաղաքապետարանի տարբեր պաշտոնյաներ վստահեցնում էին, որ ոջլոտ, հիվանդ  ծառեր են հատում»,- ասաց  Վարդանյանը:

Երևանի քաղաքապետարանի դիմաց օրեր առաջ տեղի ունեցավ բողոքի ակցիա՝ ընդդեմ Երևանում իրականացվող ծառահատումների։ Քաղաքացիներն իրենց դժգոհությունն էին հայտնում Երևանի քաղապետարանի աշխատանքից՝ ընդգծելով, որ այն, ինչ իրականացնում է «Կանաչապատում և շրջակա միջավայրի պահպանություն» ՀՈԱԿ-ը, ծառերի՝ սպանդ է։ Փոխարենը քաղաքապետը հակադարձում է՝ ավելի քան 20 գիտնական կարծիք է հայտնել, որ թեղիները պետք է հատվեն ու նոր ծառեր տնկվեն:

Ավագանու անդամը նշեց, որ ստեղծված իրավիճակը կտրուկ ազդելու է  հատկապես սիրտ-անոթային հիվանդություն ունեցողների՝ սրտամկանի ինֆարկտ, ինսուլտ, ուռուցքային ու ալերգիկ հիվանդություններ ունեցողների վրա:  «Առանց այդ էլ,  ՀՀ-ում ԱՀԿ կողմից սահմանված միջինացված թույլատրելի սահմանաչափից շուրջ յոթ անգամ աղտոտված է մթնոլորտը»,- նշեց նա:

Վարդանյանը ծառերի գնումների ոլորտում հնարավոր կոռուպցիոն ռիսկերը ևս չի բացառում: