Մեր գերնպատակը հայապահպանությունն է. «Վերածնունդ» հայկական կիրակնօրյա դպրոցի փոխտնօրեն

ՀՀ ԿԳՆ նախաձեռնությամբ անցկացվող Համահայկական կրթական վեցերորդ խորհրդաժողովին ՌԴ–ում ՀՀ դեսպանությանը կից «Վերածնունդ» հայկական կիրակնօրյա դպրոցի մանկավարժ, տնօրենի տեղակալ, մանկավարժական գիտությունների թեկնածու Շողիկ Փահլևանյանը Tert.am-ի հետ զրույցում ներկայացրեց Մոսկվայում գործող իրենց դպրոցը։

Նա նշեց, որ իրենց կիրակնօրյա դպրոցը հիմա ունի 250-ից ավելի աշակերտ, թեև սկսել են աշխատանքները 40 աշակերտից: «Հայրենիքն է մեր զարկերակը և մեր գերնպատակը հայապահպանությունն է: Ամեն կիրակի մի փոքրիկ Հայաստան է դառնում դպրոցը»,- ասաց նա:

Շողիկ Փահլևանյանը նշեց, որ իրենք կարևորում են ծնող-ուսուցիչ, դպրոց-ընտանիք կապը: «Մենք սովորեցնում ենք ոչ միայն հայերեն գրել-կարդալ, այլ նաև հայկական երգն ու պարը, որպեսզի երեխան հայկական ոգին ամբողջովին հասկանա: Զուգահեռաբար փոխանցում ենք ավանդույթները, սովորույթները, ներկայացնում ենք պատմությունը: Շատ մեծ է կապը Հայ առաքելական եկեղեցու հետ, տարին երկու անգամ՝ Սուրբ Ծնունդին և Սուրբ Հարության տոներին, պարտադիր մեր դպրոցի սաներին տանում ենք հայկական եկեղեցի և կազմակերպում ենք բաց դաս, որը վարում է քահանան»,- ասաց նա:

Դպրոցի փոխտնօրենը հայտնեց, որ «Վերածնունդ» կիրակնօրյա դպրոցը բացվել է 1988 թվականին՝ Վազգեն Առաջին կաթողիկոսի օրհնությամբ: Նա նշեց, որ «Վերածնունդը» առաջին կիրակնօրյա դպրոցն է ոչ միայն Մոսկվայում, այլ նաև Ռուսաստանում և այդ տարիներին հայը շատ ավելի էր ձգտում հայերենը, հայ երգը, ավանդույթը պահպանել:

«Իննսունական թվականներից հետո, երբ եղավ մեծ արտագաղթ, մոտեցումը փոքր-ինչ այլ կերպ դարձավ, սակայն մեր գերնպատակը մնում է ամեն ինչ անել, որ հայը չձուլվի»,- ասաց նա: