Մեխիկոյի կենտրոնական փողոցները կփակեն հանուն Ջեյմս Բոնդի

Մեքսիկայի մայրաքաղաք Մեխիկոյի իշխանությունները հայտնել են, որ պատրաստ են բրիտանացի գաղտնի գործակալ Ջեյմս Բոնդի մասին պատմող նոր ֆիլմի նկարահանումների ժամանակ փակել քաղաքի պատմական մասի որոշ հատվածներ:

Ինչպես նշում է gazeta.ru-ն, իշխանությունները ստիպված են նման քայլի դիմել, քանի որ Մեխիկոն հայտնի է իր խցանումներով, իսկ դրանք լուրջ խնդիր կլինեին նկարահանումների համար:

Հայտնի է, որ քաղաքի տարբեր հատվածներ կսկսեն փակել մարտի 19-ից, իսկ նկարահանումները կտևեն մինչ ապրիլի 1-ը:

Աղբյուրը մանրամասնում է, որ Բոնդի մասին պատմող 24-րդ ֆիլմը կոչվելու է «Սպեկտր» (Spectre): Դրա ռեժիսորը կրկին կլինի Սեմ Մենդեսը: Հայտնի է, որ նկարահանման աշխատանքները, Մեքսիկայից բացի, կանցկացվեն Մեծ Բրիտանիայում, Իտալիայում, Մարոկկոյում ու Ավստրիայում: