Ուկրաինացի օդաչուն ինքնանետում է կատարել մարտական Су-25-ի բռնկվելուց հետո

20:18 • 14.07.16

Ուկրաինական Ստարոկոնստանտինով քաղաքի թռիչքուղում ծրագրային թռիչքներ իրականացնելիս բռնկվել է Су-25 մարտական ինքնաթիռը: Ինչպես հաղորդում է Lenta.ru-ն, վկայակոչելով Ուկրաինայի ՊՆ կայքը, միջադեպը տեղի է ունեցել հուլիսի 14-ին:

Գերատեսչությունից ընդգծել են, որ օդաչուն արհեստավարժ կերպով է իրեն դրսևորել և հասցրել է ինքնանետում կատարել: Նրա վիճակը բավարար է: Հրդեհը չեզոքացվել է: Կրակի բռնկման պատճառները պարզելու համար հատուկ հանձնաժողով է կազմվել:

Աղբյուրի տվյալներով` Ուկրաինայի Զինված ուժերի օդուժը մոտ 25-30 Су-25  գրոհային ինքնաթիռ ունի, որոնք գտնվում են տարբեր տեխնիկական վիճակներում: