Օլանդը Նիսի ահաբեկչության հարցով անվտանգության խորհրդի նիստ է անցկացնում
Ֆրանսիայի նախագահ Ֆրանսուա Օլանդն ուրբաթ առավոտյան Նիսի ահաբեկչության հարցով նեղ կազմով անվտանգության խորհրդի նիստ է անցկացնում։
Հանդիպումը սկսվել է տեղի ժամանակով առավոտյան մոտ 9-ին: Հանդիպմանը մասնակցում են վարչապետ Մանուել Վալսը, պաշտպանության նախարար Ժան-Իվ Լե Դրիանը, արդարադատության նախարար Ժան-Ժակ Յուրվոազը, հետախուզության և հակահետախուզության, ոստիկանության, ժանդարմերիայի ղեկավարությունը, ռազմական ղեկավարությունը:
Սպասվում է, որ խորհրդակցության ավարտից հետո Օլանդը և Վալսը կմեկնեն Նիս՝ ողբերգության վայր, հաղորդում է «ՌԻԱ Նովոստի» գործակալությունը։
Հիշեցնենք, որ հինգշաբթի երեկոյան բեռնատարը մխրճվել է մարդկանց ամբոխի մեջ, ովքեր հավաքվել էին Նիսի Անգլիական լողափին` Բաստիլի գրավման օրվան նվիրված տոնակատարության հրավառությունը դիտելու: Զոհվել է 84 մարդ։
Ականատեսների համաձայն՝ բեռնատարն անդադար զիգզագաձև շարժումներով վրաերթի է ենթարկել մարդկանց 2 կմ շարունակ: Նա նաև կրակել է ամբոխի ուղղությամբ: Հարձակվողը չեզոքացվել է ոստիկանության ուժերի կողմից:
«Իսլամական պետություն» ահաբեկչական խմբավորումը ստանձնել է Նիսում արյունալի հարձակման պատասխանատվությունը: Այդ մասին, վկայակոչելով ֆրանսիական ԶԼՄ-ներում չհաստատված տվյալները, իր պաշտոնական կայքում գրել է բրիտանական The Daily Mail-ը:










