Եվրոպայի ամենավտանգավոր երկիրը. Ֆրանսիայում 1.5 տարում 10 ահաբեկչություն է տեղի ունեցել
Ֆրանսիական Նիս քաղաքի ահաբեկչությունը, որի հետևանքով 84 մարդ է զոհվել Բաստիլի գրավման տոնակատարության օրը, թվով 10-րդն էր վերջին մեկուկես տարում Ֆրանսիայում տեղի ունեցած ահաբեկչությունների շարքում: 2015-ի նոյեմբերին Փարիզում տեղի ունեցած ահաբեկչությունից հետո սա խոշորագույնն էր երկրի պատմության ընթացքում: Այս մասին գրում է Meduza գործակալությունը` ի մի բերելով Ֆրանսիայում տեղի ունեցած վերջին10 խոշոր ահաբեկչությունները:
2015-ի հունվար, հարձակում Փարիզի Charlie Hebdo-ի խմբագրության վրա
2015 հունվարի 7-ին Սաիդ և Շերիֆ Կուաշիները հարձակում են իրականացրել Charlie Hebdo երգիծական շաբաթաթերթի խմբագրության վրա` սպանելով 12 մարդու, այդ թվում` 2 ոստիկանի: Հունվարի 9-ին Կուաշի եղբայրները պատանդներ են վերցրել, որից հետո ահաբեկիչներին ոչնչացրել են հատուկ գործողության ժամանակ:
2015-ի փետրվար, Նիս, հարձակում հրեական կենտրոնի վրա
Մուսա Կուլիբալի անունով տղամարդը դանակով հարձակվել է հրեական կենտրոնի պահակների վրա, որից 3 մարդ տուժել է: Հարձակումից օրեր առաջ Կուլիբալիին ձերբակալել էին Թուրքիայում «Իսլամական պետության» հետ առնչություն ունենալու կասկածանքով, որից հետո արտաքսել էին Ֆրանսիա:
2015-ի ապրիլ, հարձակում փարիզյան արվարձանի եկեղեցիների վրա
Ապրիլի 19-ին 24-ամյա ալժիրցի Սիդ Ահմեդ Գլամը հարձակում էր ծրագրել Փարիզի մի քանի եկեղեցիների վրա: Նա կրակել է 33-ամյա կնոջը, ինչի ժամանակ վնասել էր ոտքը և բժշկի դիմել: Արդյունքում նրան ձերբակալել էին:
2015-ի հունիս, ահաբեկչություն քիմիական գործարանում
Հունիսի 26-ին ընկերության մատակարարման ծառայության աշխատակից ֆրանսիացի Յասին Սալին գլխատել էր իր ղեկավարին, ապա նրա գլուխը փաթաթել մուսուլմանական գրություններով կտորի մոջ ու թողել քիմիական գործարանի տարածքում:
2015-ի օգոստոս, հարձակում Thalys գնացքում
25-ամյա մարոկկացի Այուբ Խազզանին, զինված ատրճանակով, դանակով և Կալաշնիկովի հրացանով, փորձել է հրաձգություն բացել Thalys գնացքում, որը Ամստերդամից ուղևորվում էր Փարիզ: Ահաբեկչին հաջողվել է վնասազերծել պատահականության շնորհիվ. նրա հրացանը խցանվել էր, իսկ հարևան վագոնում ամերիկացի զինծառայողներ են գտնվել:
2015-ի նոյեմբեր, հարձակում Փարիզում
Ֆրանսիայի պատմության մեջ խոշորագույն ահաբեկչությունը, որն իրականացրել է «Իսլամական պետություն» խմբավորումը` բելգիացի իսլամիստների ձեռքով: Ահաբեկչությունների շարքի հետևանքով 130 մարդ էր զոհվել, այդ թվում` հայազգի Լոլա Ուզունյանը:
2016-ի հունվար, հարձակում զինվորականների վրա մզկիթի մոտ
Թունիսյան ծագմամբ ֆրանսիացին Վալանս քաղաքում իր մեքենայով ընթացել է 4 զինվորականի ուղղությամբ, որոնք հսկում էին մզկիթի տարածքը: 29-ամյա տղամարդը հարձակումն իրականացնելիս գոռում էր «Ալլահ Աքբար»:
2016-ի հունվար, Փարիզ, հարձակում ոստիկանների վրա
Հունվարի 7-ին` Charlie Hebdo-ի ահաբեկչության տարելիցի օրը, Փարիզում թունիսցի փախստականը հարձակում է իրականացրել ոստիկանության բաժանմունքի վրա:
2016-ի հունիս, ոստիկանի ընտանիքի սպանություն
Ֆրանսիայի քաղաքացին` մարոկկական ծագմամբ, Լարոսսի Աբբալլան դանակով հարձակվել է ոստիկանի վրա հենց նրա տան մոտակայքում, որից հետո կտրել է նրա կնոջ վիզը: Միջադեպից հետո Աբբալլան խոստովանել է կրկնակի սպանությունն ու երդում տվել «Իսլամական պետությանը»:
2016-ի հուլիս, Նիս
Թունիսի քաղաքացին բեռնատարով ընթացել է Նիսի ափամերձ տարածքում հավաքված մարդկանց ուղղությամբ, ովքեր հավաքվել էին տոնելու Բաստիլի գրավման օրը:










