Թուրք լրագրողը Նիսի ահաբեկչական ակտի մասին «անտակտ գրառում» անելու պատճառով հեռացվել է աշխատանքից
Թուրքական Anadolu տեղեկատվական գործակալության արտահաստիքային թղթակից Ալի Քահրիմանը Նիսի ահաբեկչական ակտի մասին անտակտ գրառում անելու պատճառով հեռացվել է աշխատանքից, հաղորդում է Hürriyet Daily News-ը։
Նշվում է, որ Anadolu գործակալությունում լրագրողի արարքն անպատասխանատու են անվանել և ընդգծել, որ նրա նյութերը «դեպքից դեպք» էին օգտագործվում։
Աղբյուրը մանրամասնում է, որ Քահրիմանին աշխատանքից ազատելու պատճառ է դարձել նրա Twitter-յան գրառումը։
«Ֆրանսիայում մարդկանց ամբոխին բախված բեռնատարի արգելակները խափանվել են։ Դա ահաբեկչական ակտ չի եղել»,- գրել է նա։ Այժմ լրագրողի Twitter-ի էջն անհասանելի է։
Հիշեցնենք, որ հինգշաբթի երեկոյան ֆրանսիական Նիս քաղաքում ահաբեկչական ակտ է տեղի ունեցել։ Բեռնատարը մխրճվել է մարդկանց ամբոխի մեջ, ովքեր հավաքվել էին Նիսի Անգլիական լողափին՝ Բաստիլի գրավման օրվան նվիրված տոնակատարության հրավառությունը դիտելու: Զոհվել է 84 և վիրավորվել հարյուրավոր մարդիկ, իսկ 18-ը ծայրահեղ ծանր վիճակում են գտնվում։










