Ֆրանսիայի ոստիկանությունը խուզարկություն է անցկացնում Նիսում ահաբեկչություն իրականացրած վարորդի տանը

12:35 • 15.07.16

Ֆրանսիայի ոստիկանությունը խուզարկություն է անցկացնում վարորդի տանը, ով հինգշաբթի երեկոյան իր վարած բեռնատարով մխրճվել է Նիսի լողափի մոտ գտնվող մարդկանց մեջ՝ սպանելով առնվազն 84 մարդու: Այդ մասին հայտնել է iTele հեռուստաալիքը՝ վկայակոչելով հետաքննությանը մոտ աղբյուրի:

 

Հեռուստաալիքը հայտնել է, որ վարորդի փաստաթղթերը հայտնաբերվել են բեռնատարում:

 

AFP գործակալությունը, վկայակոչելով ոստիկանությունում աղբյուրներին, հայտնել է, որ ֆրանսիացի քննիչները վերջնականապես հաստատել են բեռնատարի վարորդի ինքնությունը:

 

Le Figaro-ն նշում է, որ բեռնատարը, որով ահաբեկիչը մխրճվել է մարդկանց մեջ, վարձակալության էր վերցվել մի քանի օր առաջ:

 

Ավելի վաղ Reuters գործակալությունը, վկայակոչելով հետաքննությանը մոտ աղբյուրի, հայտնել է, որ ահաբեկչություն կատարած անձի ինքնությունը հաստատվել է: Նա ծագմամբ Թունիսից 31-ամյա ֆրանսիացի է:

 

Nice Matin թերթը հայտնել է, որ բեռնատարի վարորդը Նիսում ապրող 31-ամյա թունիսցի է եղել:

 

Գործակալությունը նաև հայտնում է, որ ահաբեկչության հեղինակը նախկինում հայտնի է եղել ոստիկաններին, սակայն հետախուզական ծառայությունները նրա մասին չեն իմացել:

 

Գործակալության տեղեկություններով՝ կասկածյալը ներգրավված է եղել քրեական գործերում, որոնք մասնավորապես կապված էին գողությունների և խուլիգանության հետ:

 

Հիշեցնենք, որ հինգշաբթի երեկոյան բեռնատարը մխրճվել է մարդկանց ամբոխի մեջ, ովքեր հավաքվել էին Նիսի Անգլիական լողափին` Բաստիլի գրավման օրվան նվիրված տոնակատարության հրավառությունը դիտելու: Զոհվել է 84 մարդ։

 

Ականատեսների համաձայն՝ բեռնատարն անդադար զիգզագաձև շարժումներով վրաերթի է ենթարկել մարդկանց 2 կմ շարունակ: Նա նաև կրակել է ամբոխի ուղղությամբ: Հարձակվողը չեզոքացվել է ոստիկանության ուժերի կողմից:

 

«Իսլամական պետություն» ահաբեկչական խմբավորումը ստանձնել է Նիսում արյունալի հարձակման պատասխանատվությունը: Այդ մասին, վկայակոչելով ֆրանսիական ԶԼՄ-ներում չհաստատված տվյալները, իր պաշտոնական կայքում գրել է բրիտանական The Daily Mail-ը: